வீட்டுப்புறா

காலாதி காலங்களாய்....

2011-07-01T07:19:00.000-07:00

பிரக்ஞையற்று திரிந்தலைந்த

கிரெளஞ்சப் பட்சியொன்று

மனவெளியில் தரையிறங்கியது

மிச்சமிருக்கும் வதைகளின் பொருட்டு

தீரா வேட்கையுடன் உயிர்த்தலின்

ஆதாரத்தை அலைகிழிக்கின்றது

கூர்ந்த நகங்களால்....

காலாதி காலங்களாய்

தொடர்ந்த மெளனம்

களைந்தெறிந்து

ஊழியின் உருவமாய்

மெய் சிவந்து நின்றேன்

எதிர்கொள்ளவியலாது

சிறகின் தூவிகள் பொசுங்க

ரத்தமும் மாம்சமும் கருக

வெந்தொழிந்தது.....

நன்றி : திண்ணை

பிரியம் சுமக்கும் சொற்களால்..... (பகுதி2)

2011-05-02T02:48:00.000-07:00

பிரியம் சுமக்கும் சொற்கள்

கொண்டு உனக்காய்

வடிப்பேன் ஒரு கவிதை....

மெளனக்கிடங்கில் மறைக்கப்பட்ட

மனதின் மென்மைகளை

அதில் பொதித்து

நீ அண்மிக்கையில்

பரிசளிப்பேன்

வெட்கம் குமிழ் குமிழாய்

உடைத்தபடி......

உன் நயன பாஷைகள் கண்டு

அந்தரங்கத்தில் மலரும்

சித்திரங்களின் மொழி

நானறிவேன்.....

மென்று விழுங்கும்

பார்வையுடன் நீ

என் முன் நிற்க

எல்லாம் புரிந்தும்

ஏதுமறியாச் சிறுமியாய்

நான் நிற்பேன்....

மறுதலிக்கப்படும் அன்பின் வலி

என்றும் நான் உணராதிருக்கவேண்டும்

என பிரார்த்தித்துக்கொண்டே.....

நன்றி : திண்ணை

பிரியம் பொதிந்த சொற்களால்......

2011-04-04T02:22:00.000-07:00

நித்திலப்புன்னகை சுடர் வீசிட

எனை நித்தமும் கொஞ்சிடும்

சித்திரப்பூவே.....

கருத்தொருமித்த காதலின்

பரிசாய் என் கருவறையில்

கனிந்திட்ட கனியமுதே....

நின் முகத்தினெழிலிங்கு இயம்பிட
முயன்று முத்தமிழும் தோற்றிட்ட
அற்றைய பொழுதில் அகமகிழ்ந்தேன்.....

மெல்லிதழாலும் பூங்கரத்தாலும்
இன்பப்பொழினிடையில்
உயிரினமுதம் பொழிகையில்
என் சிந்தை திறை கொடுத்தேன்....

என் புலன் வருத்தி இப்புவியில்
நீ பாதம் பதித்த இந்நாளில்
நமையாளும் ஈசனிடம்
நலம் பல உனை சார்ந்திட
நல்லருள் செய வேண்டுகிறேன்....

இன்று என் இளைய மகன் கார்த்திகேயனின் பிறந்த நாள்
வாழ்த்துங்கள் நண்பர்களே ........

நீளும் இகற்போர்...

2011-03-09T02:00:00.000-08:00

சிநேகத்தின் வேர்கள்

கருகுவதை கண்டு

உயிர்ப்பின் தாளலயம்

ஸ்வரம் தப்பிடும்...

நிகழ்கால நிஜத்திற்கும்

இறந்தகால நிழலிற்கும்

நடுவே மனம்

வெகுவாய் அலைப்புறும்....

பொய் என தெரிந்தும்

மெய் அன்பின் வாசனையை

விரும்பும்....

இனம்புரியா ஏதோ ஒரு

உணர்விழைநெய்யப்படுவதும்

நெய்யப்பட்டஅம்மாயத்திரை

சிதறடிக்கபடுவதுமாய்

நீளும் இகற்போரில்

என் நெஞ்சம் துவளும்...

நன்றி : திண்ணை , கீற்று

தனிமையில் அழல்.....

2011-02-07T23:23:00.000-08:00

இது காறும் என் உலகில்
இது போன்ற நிகழ்வுகளே அதிகம்....

என் அன்பு அற்பமாகவும்
என் அக்கறை அவமதிப்பாகவும்
என் நேசம் வேஷமாகவும்
என் பாசம் பைத்தியக்காரத்தனமாகவும்....
என் கருத்துகள் கர்வத்தின் வெளிப்பாடாகவும்
உங்களுக்கு தோன்றிடலாம்....

அவரவர் உலகம்
அவரவர்க்கான கோணங்களில்
அவரவர்க்காய்......

உங்களுக்கான பாதையில்
உங்களின் நடையை
நான் எப்போதும்
தடுக்கப்போவதேயில்லை.....

என் வீட்டு தோட்டத்தில்
என் கரம் பிடித்து நடக்க
காத்திருக்கும் இரு சிறு
வண்ண மலர்களின்
ஸ்பரிசம் போதும் எனக்கு
விட்டுவிடுங்கள் தயை கூர்ந்து
விலகிச்செல்லுங்கள்.......

மிருகம் ஒன்று ( இரண்டாம் பாகம்)

2010-12-23T02:20:00.001-08:00

நான் நேசித்து வந்த

மிருகமொன்று

யாசித்து வந்தது

யோசித்து சொல்வதாய்

பேசித்து அனுப்பி
தவிர்த்திருக்க....

தனித்திருந்து

பசித்திருந்த

அம்மிருகம்

மென் தசைகளும்

குருத்தெலும்புகளும்

நொறுக்கி

மெதுவாய் எனை வென்றது

பின்னொரு நாளில் கொன்றது!!!

கரைந்த நிழல்.....

2010-12-14T22:43:00.000-08:00

தூக்கம் வேர்பிடிக்காத் தருணமொன்றில்
தனிமையின் சாளரத்தில் வீற்றிருந்தேன்
அந்தியெங்கும் சாம்பல் வர்ணோவியம்
கோட்டுச்சித்திரமாய்.....

சிலந்தி வலை பின்னலாய்
தொடரும் சிந்தனைகள்.....

எங்கோ ஒரு ஒலம் கேட்க
மனம் பதைத்து வெகுதூரம்
தேடியலைந்தேன்.....

பின் இலை பெய்து முடித்த
மரமொன்றின் கீழ் நின்று
என் நிழல் நோக்க அது
விம்மிக்கொண்டே கரைந்தழிந்தது.....

எனக்கு நானே துணையில்லை
என்பதை உணர்ந்து மனம் பதைக்க
இலக்கற்று நடக்கத்தொடங்கினேன்.....

பேசும் பொற்சித்திரமே!!!!

2010-12-08T22:29:00.000-08:00

கன்னத்தோடு கன்னமிழைத்து

முத்தம் நூறு தந்துவிடு

கண்ணிமை வருடலில்

கவலையெல்லாம் தீர்த்துவிடு....

முந்தானை போர்வைக்குள்
முகம் போர்த்து
பூ விழி வருடலில்
என் மனம் சாய்த்து
என் உதிரம் சுவைத்து வளர்ந்த
பிள்ளைக்கனி அமுதே
பேசும் பொற்சித்திரமே...

உன் பிஞ்சு பால் சதையை
அள்ளியெடுத்து
கொஞ்சி மகிழ்கையில்
உளம் களித்திருப்பேன்
எதிர் வரும் இன்னல் யாவும்
எதிர்த்து நான் நிற்பேன்........

பிரிய தோழி தீபாவிற்கு பிறந்த நாள் வாழ்த்துக்கள்!!!

2010-12-06T08:08:00.001-08:00

பள்ளி தோழி அவள்...

என் பால்யத்தில் பாதி அவள்...

பாசமிகு சிநேகிதியாய்...

பதின்ம வயதில் என் காதலியாய்...

பசுமரத்தணியாய்

பதிந்திருக்கும்

சிநேகத்துடன்

கரம் கோர்த்து அவளுடன்

சுற்றி திரிந்த நாட்கள்

இன்று பாரதத்தின் ஏதோ ஒரு

மூலையில் நீயும்....

மற்றொரு மூலையில் நானும்....

உன் குடும்பத்தாரின்

அன்பு வலையில்

அகப்பட்டுக்கொண்டிருக்கும்

என் பிரிய சிநேகிதியே....

இன்று பிறந்த நாள் காணும்

நீ என்றும் நலமே வாழ

வாழ்த்தும்

உன் அன்பு தமிழ்....

I MISS YOU A LOT MY DEAR.....

எனக்கான கவசங்கள்....

2010-11-16T05:09:00.000-08:00

எனக்கான கவசங்களுடன்

பிரசவிக்கப்பட்டிருக்கின்றேன்.....

உளைகிற மனம்

உள்ளே அழுதாலும்

வெளியே முகம் மலர்த்தும்

கலையை உங்களுக்காய் வளர்த்திருக்கிறேன்.....

எமை நொறுங்கச் செய்து

நெஞ்சில் நெறி கட்டி

கொண்டவை எவரிடத்தும்

பகிரப்படாது என்னுள்

புதையுண்டிருக்கும்.....

காலத்தின் சுழற்சியில்

கட்டுக்கள் கழன்றிட

சுதந்திர வானில்

சிறகசைப்பேன் வான்தொட்டு.....

என் மீள்வருகைக்காய்

நீங்கள் தவமிருக்கும் நாட்களை

மனத்திரையில் கண்டு களித்திட்டு.....

கலியுகபுருஷனும் பிரம்மராட்சதனும்.....

2010-11-11T05:09:00.000-08:00

காதல் கொண்டு

கரம் பிடிப்பான்

கருத்தொருமிக்கவில்லையெனில்

கழட்டிவிட்டுச் செல்லும்

கலியுகபுருஷனும்....

தன் தேவை முடிந்ததும்

பெண் (பிள்ளை) தேவையில்லை என

கருவறையை

கல்லறையாக்குபவனும்....

பத்து வயது குட்டி பெண்ணோ

பருவத்து சுட்டி பெண்ணோ

பத்தினியோ

பரத்தையோ

கொன்றழித்து தின்றொழி

காமப்பசிக்கு

குற்றமொன்றுமில்லை எனும்

நவீன சாத்தான்களும்....

பெண்ணின் பிணத்தை கூட

புணரும் பேராண்மை

படைத்த

பிரம்மராட்சதர்களும்

உலவும் பூமியில்....

பெண்ணாய் பிறப்பெடுத்தற்கே

பெரும்பாவம் செய்திருத்தல் வேண்டும்.....

வீசும் தூறலிடை....

2010-11-09T07:09:00.000-08:00

மண்ணை முத்தமிட்டு

துள்ளிகுதித்து தாளலயத்துடன்

சங்கீதம் கற்றுக்கொடுக்கும்

வெள்ளிமலர்த்தூவல்...

வீசும் தூறலிடை

மழை நூலில் கோர்த்த

நீர்ப்பூக்கள் நம்மேல் விழ....

மழையின் சீண்டலுக்கு ஒளிந்து

நாம் மரத்தடியில் ஒதுங்க.....

நீள்விசும்பினிடை நீந்தும்

நிலவும் நட்சத்திரங்களும்

நமை கண்டு நகைக்க.....

அரும்புகள் கண்சிமிட்ட

இலைகளெல்லாம்

வீழ்கின்றன அடுத்தடுத்து.....

கண்களில் நேசம் கொண்டு

நீ எனை பருகும் இக்கணத்தில்

மெளனத்தின் பொருட்டு

இதழ் மூடியிருப்பின்

இம்மழைக்காலத்தின்

மாலைப்பொழுதில்

தப்பித்துக்கொள்வேன்

உன்னிடமிருந்து...

காவியுடைக் கள்வர்கள்

2010-10-30T05:58:00.000-07:00

அண்ட சராசரங்கள் எம்

ஆளுகைக்கு கீழ் என்பன் தமை

அண்டி நிற்போர்க்கு

ஆனந்தமே எல்லை என்பன்.....

சிந்தாந்த செதுக்கல்களை நம்

சிந்தைக்கு தெளித்திட்டு

சிற்றின்பத்தில் மூழ்கும்

அற்பப் பதர்கள் இவர்கள்.....

கஞ்சாவும் கொகேயினும் முகர்ந்து

பிரம்மத்தை அறிந்ததாய்

பினாத்திடும் பித்தர்கள்.....

களைந்தொழிக்கவேண்டும்

கபால விழிகளில் மிகுந்திருக்கும்

காமத்தை அறியா கன்னியருக்கு

களவியல் பாடத்தை

கற்பிக்கும்

கள்ளவிஷக்காளான்களை

கயமையில் திளைத்திடும்

காவியுடைக்கள்வர்களை.....

குருதி வேட்கை .... ( நன்றி கீற்று )

2010-10-26T07:31:00.000-07:00

எனை ஒரு வளர்ப்பு

மிருகமாகவே

கருதுகின்றனர்.....

நில் என்றால் நிற்பதற்கும்

செல் என்றால் செல்வதற்கும்

கட்டளைகளுக்கு அடிபணியவும்

கட்டுப்பாடுகளுக்கும் பழக்குகின்றனர்

ஆழ்ந்த சினேகத்தின் நகைப்போடு.....

என் சுயத்தை

அவர்கள் வெறுக்கின்றனர்....

அவர்கள்

அறிவதாயில்லை

என்னுள்ளும்

கோரைப்பற்களும்

கூர் நகங்களும்

குருதி வேட்கையுடனிருப்பதை....

கீற்றில் வெளிவந்த என் கவிதை

விழிப்பிளவுள் சரிந்தவள்!!!!

2010-10-19T06:17:00.000-07:00

உன் விழிப்பிளவுள்

வழுவிச் சரிந்தவளை

விலகவிடாதே

இறுக அணைத்துக்கொள்

இடைவெளி அதிகம் வேண்டாம்.....

கழுத்து வளைவில் முகம் புதைத்து

காதோரம் மெல்ல கிசுகிசுத்து

காதலை மெல்லச் சொல்

எனை கொல்லாமல் கொல்....

இருளின் நிறத்தில் ஒளிர்கின்ற

மீசையின் ஒற்றைமுடி

ஸ்பரிசத்தில் நான் கிளர்ந்தெழ

முத்தங்களால் கன்னக்குழியை நிரப்பி

சுவாசப்பையை சலம்பி திரியவை....

மெளனங்களும் மறுகல்களும்

குழைவுகளும் சினுங்கலுமாய்

பேரானந்த களிப்பில் உன்

உள்ளங்கை வெப்பத்தில்

நான் உருகும் இக்கணத்தில்

நிகழட்டும் என் மீள்பிறப்பு.....

கருப்பையின் வலி....

2010-10-12T02:18:00.000-07:00

எண்ணற்ற விரதங்கள்

பரிந்துரைக்கப்படும்

பிள்ளையற்றவளுக்காய்....

எண்ணிலடங்கா

இன்னல் தரும் பட்டங்கள்

இலவசமாய் வழங்கப்பட்டு

இதயத்தின் அடியாழம் வரை

ரணப்படுத்தப்படும்....

வித்தியாசமான வைத்தியங்கள் தரும்

விதவிதமான வாதைகளை விட

வார்த்தையம்புகள்

வலிக்கத்தைக்கும்....

வாராது வந்த மாமணியே

என் மணி வயிற்றின் தாழ் திறப்பது

எப்போது என

ஏக்கங்களை சுமந்து

காத்திருப்பவளுக்கு மட்டுமே தெரியும்

காத்திருத்தலின் வலியும்

காலியாய் கிடக்கும் கருப்பையின் வலியும்....

நெருப்பு குளியல்....

2010-10-04T02:58:00.000-07:00

முகமறியாத போதும்

எனை முன்னிறுத்தி.....

பொய் வார்த்தைகளாலும்

நயவஞ்சகங்களாலும்

ஓயாத துரோகங்களாலும் நிறைக்கப்பட்ட

அழுகிய புன்னகையின் துர்நாற்றம்

கண்ணுறுகையில்.....

அடிபட்டு ஓலமிட்டு பின் அடங்கும்

மனம் அதனிடம் சப்திப்பதற்கு

மொழியின்றி ஸ்தம்பிக்கிறேன்....

பனிப்புற்களில் பாதம் பதித்து

ஏறுவெயிலில் நான் நடக்க

கசியும் மோனவெளியில்

கதிரவனின் வெளிச்சத்தில்

நிழல் அழிவதை

கண்டு துக்கம் பீறிட

மரத்திடும் நெருப்புக் குளியல்.....

-----------------------------------------------------------

செந்தூரபந்தம் தொடரட்டும் என்றும்!!!!!

2010-09-02T03:13:00.000-07:00

நாதஸ்வர மேளதாளங்கள் முழங்க

நற்றமிழாலும் அற்றமிழாலும்

நல்லோர்கள் வாழ்த்த.....

பட்டாடை சரசரக்க

புது மெட்டி ஒலிக்க

நறுமலர்களால் கோர்க்கப்பட்ட

மாலையை தோளில் ஏந்தி....

சந்தனக்களபமும் திலகமும் சூடி

விழிகளில் விரவியஅழகிய

விதிர்ப்புடனிருக்கும்

மணமகளுக்கு

மங்கல நாணை

மணமகன் சூட்ட....

பூச்சொரிதலாய்

இனிய உணர்வுகளுடன்

தொடங்கும்

இச்செந்தூரபந்தம்

தொடரட்டும் என்றும்!!!!

கடல்புறா பாலாவின் சகோதரி

சங்கீதாவிற்கு இன்று திருமணம்

வாழ்த்துவோம் வாருங்கள்

எதிர்வரும் நாளெமதில்!!!!

2010-08-31T02:50:00.000-07:00

நிசப்தம் பூக்கும் இரவொன்றில்
வனாந்திரப்பேரமைதியில்

இலக்குகளற்றவெற்றுச்சுவடுகளில்

உறக்கமற்று அலைகிறேன்

வசீகரமிழந்து......

அடுத்தொன்று

இன்னொன்று

மற்றொன்று

பிறிதொன்று

எனத்தேடித்தளர்ந்து.....

தன்னம்பிக்கை தத்தளிக்க

தோல்வித்தருணங்கள் சூழ்ந்திட

மனம் பிறழ்ந்து

உளறிந்திரிந்து

மிழற்றுகிறேன்மூர்க்கமாய்....

எதிர்வரும் நாள் எமதில்

இற்றிடப்போகும்சிறகின்

நிலைநினைந்து.....

வேண்டும் விடுதலை!!!!

2010-08-26T04:23:00.000-07:00

யார் சொல்வது நாம்

அடிமைத்தளையிலிருந்து

விடுபட்டுவிட்டோமென.....

அழுகிச்சிதைந்து

ஆணிவேரில் புற்றேறி

அருவெறுப்பாய் நிற்கின்றது

நம் நாட்டு அரசியல்.....

சொந்தமக்களை சோற்றுக்கு

அலையவிட்டுவிட்டு அன்னியனை

ஆளவைத்து அழகு பார்க்கின்றோம்

அதிகாரங்களுக்கு அடிமைப்பட்டு....

விதேசிகளை துரத்திவிட்டதாய்

பீற்றிக்கொண்ட சுதேசிகள் இன்று

விதேசி பொருட்களுக்கு அடிமையாய்....

ஜாதியென்றும் மதமென்றும்

இனமென்றும் மொழியென்றும்

நமை நாமே பகுபடுத்தி திரிகின்றோம்

மூளையிருந்தும் அடிமையாய்.....

போதும் இந்தியனேபோதும்

நிலைகெட்டு மானம்கெட்டு

அலைந்து திரிந்தது போதும்

புறப்பட்டு வா

புதிய பாரதம் அமைப்போம்

உண்மையான சுதந்திர

காற்றை சுவாசித்திற்போம்..

சரியும் இரவு!!!

2010-08-19T10:28:00.000-07:00

மெல்ல இரவு சரிந்து

மேகம் தரையிறங்கியது....

மண் தரையிலோ

மழையின் கால்தடங்கள்....

மஞ்சள் வைரங்களாய்

மவுனமொழி பேசும் நட்சத்திரங்கள்...

இவையணைத்தையும்

இயல்பான ரசனையுடன் குழைந்து நான்

இயற்கையுடன் ஒன்றிட்டேன்....

காற்றும் மழையும்

தென்றலும் தூரலும்

பனியும் குளிரும் வாடையுமாய்

எனை தழுவிச்சென்றது அருவி....

எரியும் இருளினூடாக

அருவி நீரோடு மிதந்தழிந்தது

என் இன்ன பிறவும்!!!!

இதயம் ரணமானது

2010-08-10T10:20:00.000-07:00

திக்கற்ற வெளியில்
திசையறியாது

தவிக்கின்றேன் தோழி
திரும்பி பார்த்தால்

உற்றவள் நீயும் இல்லை
உறவினரும் இல்லை.....

கண்ணில் உனை வைத்தால்
கண்ணீருடன் கரைந்திடுவாய்

என எண்ணி உன்னை
என் இதயத்தில் அன்றோ இருத்தினேன்
என் இதயத்தின் ஓசை கேட்டு

இதமாய் நீ உணர்வாய் என
இன்று இதயமும் ரணமானது
இதுவே நிஜமானது.....

செத்துவிட்ட என் மனதை இனி
சுடுகாட்டு தீயா சுட்டுவிடும்...

யாருமற்ற வான் பொய்கையில் வெறுமையுற்ற நிலா !!!

2010-08-01T10:30:00.000-07:00

அவள் வாழ்வில்
மகிழ்ச்சி நிறைந்த வார்த்தைகள்
அனைத்தையும் ஒருவன்
களவாடிசென்று விட!!!!

அக்கினிப்பூவாய் தகிக்கும் மஞ்சத்தில்
தோகையெனத் துவள்கிறாள்
அமைதியின் கரிய காலடியில்
மனுஷர்களின் பேராசையினால்
காயப்பட்ட பூஞ்சிறகாய் அவள் மனம்!!!!

இதுவரை அழுந்தித் துயர் தரும்
வலிகளை பிடுங்கியெறிய
அவள் ஓடிக்கொண்டிருக்கிறாள்
பாத மணற்கற்றைகள் எரிய!!!!

கானகத்தின் நீட்சி கொண்ட
உயிர்த்தாவரத்தின் மலர்க்கும்
சொல்லொன்றில்
அரும்பித்தழைக்கவேண்டும்....

யாருமற்ற வான் பொய்கையில்
வெறுமையுற்ற நிலாவின்
மென்னகையின் இலைகள்!!!!

பிஞ்சுகள் துயின்றிடும் பொழுதில்!!!

2010-07-26T07:21:00.000-07:00

மெல்லிய விரல்களால்

என் நரம்பு வயல்களில்

நடவு நட்டு....

என் வெப்பத்தை

போர்த்துக் கொண்டு

உறங்கவேண்டுமென

உப்பு மலர்களை

உதிர்க்கின்ற குட்டி நட்சத்திரம் ஒன்று!!!

ஊற்றாய் சந்தோஷம் பொங்கிட

உள்ளார்ந்த குறும்பில்

உதட்டோரம் சிறு குழிவுடன்

செம்பஞ்சுக்குழம்பில் தோய்த்த

பிஞ்சப்பாதங்களுடனும்

செல்லச்சிணுங்கலும்

மெல்லிய மினுங்கலுமாய்

என் மார்போடணைத்து

மடி மீது அமர்ந்து

சிறு கதை சொல்ல

கேட்டு கண்ணயரும்

பட்டுத்தென்றல் மற்றொன்று!!!!

இவர்களின்

மோகனப்புன்னகையில்

மயங்கி நின்றதில்

என் கவிதைகள் யாவும்

முற்றுப்பெறாமல் முடிந்துவிடுமின்று.....

நிலவின் ஒளியில் உருகும் சூரியன்!!!

2010-07-14T09:11:00.000-07:00

சூரியன் தன் வீரியத்தை

தொலைத்த கோபத்தில்

சிவந்து தணிந்து

கொண்டிருந்த வேளையில்

ஒரு தர்க்கத்தின் முடிவில்

உயிரை கருக செய்யும்

திராவகத் துளிகளை

அவன் வார்த்தைகள் சிதற

கந்தகமிட்ட காகிதமாய்

வெந்து உலர்ந்தது நெஞ்சம்

உணர்வுகளின் மௌன மறுகல்

ஊமை மலர்களின் மௌன விகசிப்பாய்

மெல்ல மெல்ல குறைந்தது விசும்பல்கள்

சற்றே மனம் அடங்கி குளிர

வெட்க புன்னகை யொன்று இதழ்களில் தோன்றி

தேகம் முழுவதும் பரவ

விழி நாணேற்ற

முறிந்தது அவன் திமிர்

உள்ளே ஏதோ ஒன்று இற்று உருகிட அதன்

சாறாக கண்ணில் நீர்!!!!

வன்மம் தீரா பெருவெளி!!!

2010-07-07T09:05:00.001-07:00

நெடியதொரு தனிமைவெளியில்
நான் நதியின் ஊடாக
அலைவு கொண்டிருந்தேன்!!!

சலனமற்ற நீர் பிம்பத்திலோ
பரிகாசத்தின் வேதனை!!!

விதியின் சறுக்குப்பாதை
தந்த கசப்பை
தினமும் விழுங்கிக் கொண்டிருக்க!!!

சிலரின் வன்மம் படிந்த
வார்த்தைகளோ
அம்பென பாய்ந்து இப்பொழுதும்
குருதியை பெருக்கிக்கொண்டிருக்கின்றது!!!

என் அன்பு மகன் பாலாஜிக்கு பிறந்த நாள் இன்று!!!!

2010-07-03T00:20:00.000-07:00

எண்ணற்ற தவத்தின் பலனாய்
எனக்குள் உதித்த சூரியனே!!!

மலரிதழ்களில் வியர்த்திருக்கும்
பனித்திவலைகளாய்
உன் மழலை மந்தகாசமும்
குறுகுறுத்த விழிகளில்
கசியும் புன்னகையுமாய்
எனை வளைய வரும்
பேசும் பொற்சித்திரமே!!!
இன்று பிறந்த நாள் காணும் நீ
பார்போற்ற பல்லாண்டு காலம்
நீடுழி வாழ வாழ்த்துகிறேன்!!!!

மாயை!!!!!

2009-08-31T23:04:00.000-07:00

மனம் எனும் மாயை அதன்
இருப்பிலும் இல்லாமையிலும்
காலபெருவெளியில் மிதந்து அலைகின்றது!!!

நினைவு ரேகைகள்
ஞாபக வாசனையை பரவவிட்டுக் கொண்டே
நரம்புகளை அவிழச் செய்கின்றது!!!!

தூக்கமும் விழிப்பும் அற்ற நிலையில்
கிளைக்கும் அதன் தீனமான குரலில் தெரிகின்றது
பொங்கிகொண்டும் பெருகிக்கொண்டும்
இருக்கும் அதன் வேட்கைகள்!!!

நிம்மதியற்ற பயணங்களும் துரத்தல்களும்
மனதின் மென்மைகளைஉருமாற்றியதால்
மழை நாட்களை போல்
மனமும் புகையோடி போய் இருக்கின்றது!!!!

பல சமயங்களில்
வியூக சூட்சமம் அமைத்தும்
சில சமயங்களில் வெடவெடப்பும்
மெலிவும் கொண்டு மடிந்து சுருள்கிறது
ஆனாலும் மீண்டும் உயிர்த்து நிற்கிறது!!!!

சுழற்புதிர்!!!

2009-08-30T11:12:00.000-07:00

தயக்கங்களும் தவிப்புகளும்
வேடிக்கைகளும் வினோதங்களும்!!!

வலிகளும் வதைகளும்
பூரிப்புகளும் புல்லரிப்புகளும்!!!

அலைப்புறுதலும் அவலமும்
நிறைந்த வாழ்கை பயணம்
ஒரு சுழற்புதிர் பாதையாக செல்கின்றது!!!

கடந்து வந்து விசித்திர பாதைகள்
கடந்த காலமெனும் தாழியில்
போய் விழுந்து விடுகின்றது!!!

காலமெனும் விசை
யாவையும் சுற்றிவிடுகின்றது!!!

அவமதிப்பு எனும் நிழல் நீள்வதும்
சுருங்குவதுமாய் தொடர்கின்றது!!!

ஆனாலும் பாதையின் தொலைவு
விலகாமல் நீண்டுகொண்டே செல்கின்றது!!!!

என் அன்பு காதலா!!!! (To My Sweet Hubby)

2009-08-29T00:27:00.000-07:00

சிறு பெண்ணாக உன் கையில்
ஒப்படைக்கபட்டேன்
சின்னச் சிறு நாற்றாக என்னை
உன் வீட்டு தோட்டத்தில் ஏற்று கொண்டாய் !!!!

அங்கு உள்ள ஆலமரத்திருக்கு
அடிபணிய கற்று குடுததாய்
நாணலாக வளைந்து போக சொல்லி தந்தாய்
உன்னால் எனது உலகம் இனிமை ஆனது !!!

பாறை ஆக இருந்த என் மனம்
உன் பார்வைகள் மூலம் பூ ஆனது
உன் முகம் பார்த்து இதழ் விரித்ததால்
நான் தாமரை ஆனேன்!!!

உன்னை தொடர்ந்து முகம் திருப்புவதால்
நான் சூரிய காந்தி ஆனேன் !!! சில நேரங்களில் விதியின் சதியால்
நான் எரிந்து சாம்பல் ஆனேன்
உன் அன்பால் உயிர்த்து எழுந்தேன்
பினிக்ஸ் பறவை ஆக !!!

எனக்கு தெரியும் நீ
என்னை விட அழகன் என்று
உன் அருகில் இருப்பதால் நான் அழகி ஆனேன்!!!

எனது வலிகளின் போது நீ துடித்தாய் ...
எனது பிதற்றலை நீ சகித்தாய் ...
என் கண்ணில் கண்ணீர்
காணும் போது நீ கதறி அழுதாய் ....

எனது பனி காலத்தில்
உனது பார்வை ஒன்றே போர்வையாக
எனது இளவேனிர்காலத்தில் குளிர் காற்று நீ
இருட்டிலும் என் நிழல் நீ
இறுதி வரை வரும் உறவு நீ !!!!

என்ன வேண்டும் என்று என்னிடம் கேட்டாய்
விலை மதிப்பில்லாத உன் காதல்
என்னிடம் இருக்கும் போது
விலை பெறகுடிய பரிசா நான் கேட்பேன்??

என் வாழ்நாள் முழுமைக்கும்
உனது அன்பு மட்டும் போதும்!!!!

பி.கு : வலையுலகில் எனது முதல் கவிதை (கவுஜ) , மீள்பதிவு

வண்ண வண்ண கனவுகள்!!!

2009-08-27T09:28:00.000-07:00

வானவில்லின்
வர்ண சிதறல்களாய்
கண்ணிமைக்குள் ஜனித்திடுகின்றது
வண்ண வண்ண கனவுகள்!!!

அலைபேசியின் அலைகளோ
தொலைபேசியின் தொல்லைகளோ
இல்லா உலகிற்கு என்
கைப்பிடித்து நீ எடுத்தேகுவதாய்!!!!

அங்கு வானம் நம் இல்ல
வாசலில் நிறைந்திருப்பதாய்

விழி நீரில் நான் கோலமிடின்
உன் விரல் கொண்டு
நீ துடைப்பதாய்....

உன் அன்பான
கரங்களின் கட்டளைக்கு
நான் ஆட்படுவதாய்
நீண்டு கொண்டே செல்கின்றது
என் கனவுகளின் சாம்ராஜ்ஜியம்
கூட முடிவற்றதாய்......

விருதுகள் பலவிதம்!!!

2009-08-26T23:58:00.000-07:00

மீண்டும் ஞானசேகரன், கடையம் ஆனந்த் மூலம் எனது தளத்திற்கு கிடைத்த விருது 20 பேருக்கு பகிர்ந்தளிக்கப்படுகின்றது

மிக குறுகிய காலத்தில் சிறப்பாய் பல பதிவுகள் மூலம் எனை ஆச்சரியப்படவைக்கும்

1.வித்யா - பக்கோடா பேப்பர்கள்

2.நேசமித்ரன் கவிதைகள்

3.ஜெஸ்வந்தி - மெளனராகங்கள்

4.பிரியமுடன் வசந்த்

5.கலையரசன் - வடலூரான்

6.பா.ராஜாராம் - கருவேல நிழல்

7. ஜமால் அண்ணா - கற்போம் வாருங்கள்

8.அ.மு.செய்யது - மழைக்கு ஒதுங்கியவை

9.தமிழரசி - எழுத்தோசை

10.இயற்கை மகள்

11.ஹேமா - வானம் வெளித்த பின்னும்

12. நவாஸ் அண்ணா - மனவிலாசம்

13. அபு அண்ணா - என் உயிரே

14. ரம்யா - WILL TO LIVE

15. ஷ‌ஃபிக்ஸ் ஷ‌ஃபி உங்களில் ஒருவன்

16. சுரேஷ் - என் பக்கங்கள்

17 . சந்ருவின் பக்கம்

18 பிரிவையும் நேசிக்கும் காயத்ரி

19 அன்பு - open heart

20 பாலா - கடல் புறா

KEEP ROCKING FRIENDS !!!!!!!!

யாருமற்ற......

2009-08-25T10:47:00.000-07:00

யாருமற்ற வெட்டவெளியில்
சிறகு விரித்து பறக்கும் இந்த
சின்ன புறா

பெற்றவர்களும் மற்றவர்களும்
இணையாய் வந்தவரும்
துணை என சொன்னவர்களும்

தங்களுக்கு தாங்களே
வட்டமிட்டு குறுக்கிக்கொள்ள நான்
தனிமைத்துயரில் தவித்து
தக்கையாகிவிட

கசப்பேறிய மனதோடு
வெளிப்படுத்தமுடியாத
கோபமும் ஆதங்கமும்
நிராசையுமாக வாழ்கையை
கடத்திக்கொண்டிருக்கின்றேன்
எல்லோரும் சூழ இருந்தும்
_________யாய்....

நண்பர் சிங்கை நாதனுக்காக பிரார்த்திப்போம்

2009-08-24T09:45:00.000-07:00

நண்பர் சிங்கைநாதனுக்கு ஏழு மணி நேரங்கள் கொண்ட அறுவை சிகிச்சை வருகின்ற 27ஆம் தேதி காலை எட்டு மணியளவில் (சிங்கை நேரம்) நடைபெற உள்ளது.

எல்லோருமாக அவருக்காக பிரார்த்திப்போம்.

இங்கும் பாருங்கள்

முடிந்த அளவு இவ்விடயத்தை உங்கள் வலையின் மூலம் உங்கள் நட்புகளுக்கு கொண்டு செல்லுங்கள்.

அன்புடனும் நட்புடனும் …

சக்தி

அழகு ....காதல்.... பணம்.... கடவுள்???

2009-08-22T09:37:00.000-07:00

இந்த தொடர் பதிவுக்கு என்னை அழைத்திருக்கும் ஹேமா அவர்களுக்கு நன்றி இன்று வலையுலகத்தின் சமூக அக்கறையுள்ள பெண் கவிஞர் +என் அபிமானத்திற்குரியவரும் கூட இவரின் கவிதைகளில் உள்ள கருத்துகள் எனை அதிகம் சிந்திக்க வைக்கும் இந்த வலையுலகத்தில் நான் நுழைந்த புதிதில் இவரை கண்டு ஆச்சரியப்பட்டதுண்டு .அவர்கள் எனை தொடர் பதிவு எழுத அழைத்திருப்பதில் மிக்க மகிழ்ச்சி

அழகு

புற அழகு கண்டு தான் நாம் அனைவரும் நடைமுறை வாழ்கையில் பழகுகின்றோம் இது தான் நிஜம் ஆனால் அவர்களின் உண்மைமுகம் காணும் போது வெகுவாய் வருத்தப்படுகின்றோம் எதை

அழகு என்று நாம் நினைக்கின்றோமோ
அது அழகு அல்லஅது விரைவில்
அழிந்து விடக்கூடிய ஒன்று
இதை உணர்பவர்கள் வெகு சிலரே.....

அன்னை தெரசா போல்
அழகி யார் உள்ளார்கள் இந்த உலகில்
மறைந்தும் கூட நம்
மனதை விட்டு அகலாத பேரழகு!!!

காதல் இன்றைய காலகட்டத்தில் காதல் என்பது இனக்கவர்ச்சி தான் உண்மை காதல் அழிந்து கொண்டு வருகின்றது காதல் கூட பண்டமாற்று முறை போலாகிவிட்டது வேதனைக்குரிய விஷயம் இதை பற்றி நான் முன்பு எழுதிய வரிகள் இது

ஞாயிறுகளில் ஆரம்பிக்கப்படும்
நட்பு எனும் பெயரில்
திங்களில் திரிந்து
செவ்வாயில் கனிந்து
புதனன்று காதல் சொல்லப்பட்டு
வியாழனன்று மோகம் வென்றுவிட‌
வெள்ளியன்று ஊடல் கொண்டு
சனியோடு தொலைந்து போகின்றது

இப்பொழுது காதல் எனும் பெயரில்
உதிக்கும் இனக்கவர்ச்சி இளையவர்களிடம்

பணம்

மனிதனால் உருவாக்கப்பட்ட வஸ்து
ஆனால் இன்று மனிதர்கள்
இதை வைத்து தான் மதிக்கப்பட்டு வருகிறார்கள்
என்பது தான் நிஜம்.

இந்தியா முன்னொரு காலத்தில்
உலகத்தால் வியந்து பார்க்கப்பட்ட நாடு

இன்று ஏழை நாடுகளின் பட்டியலில் எனவே
இந்தியர்கள் மேலை நாடுகளின்

கலாசாரத்திற்கு மாறிக்கொண்டிருக்கின்றோம்
எனவே பணம் இருக்கும் நாடு,மனிதனை தான்

எல்லோரும் விரும்புகின்றார்கள்
அவர்கள் எப்படியிருந்தாலும்.....

கடவுள்

ஒவ்வொருவராலும்
ஒவ்வொரு விதமாய் பெயரிடப்பட்டு
வித விதமாய் வழிபட்டாலும்
அன்பு தான் கடவுள்

அன்பே சிவம் என்னும் இந்துத்துவம்
அல்லா கருணை உள்ளவர் என்னும் முஹம்மத்
இயேசு இரக்கம்உள்ளவர் எனும் கிறிஸ்தவம்
என்றாவது அடுத்தவரை இம்ச்சிக்கசொல்கிறதா !!!

கடவுளின் பெயரால் மனிதம் தொலைவது தான் மிக கொடுமை!!!

இது தான் என் எண்ணம் ,கருத்துகள்

இந்த தொடர் பதிவுக்கு நான் அழைப்பது

நட்புடன் ஜமால் அண்ணா

நவாஸ் அண்ணா

பிரியத்திற்குரிய வசந்த்

கடல்புறா பாலா

ஜெஸ்வந்தி

ரம்யா அக்கா

மிருகம் ஒன்று!!!!

2009-08-21T07:45:00.000-07:00

பின்னிரவில் எனக்குள்
எழும் மிருகம் ஒன்று
தன்னிரு கரங்களுடன்
எனை அழிக்கவேண்டுமென்று....

என்னால் ஒரு கட்டத்தில் நேசிக்கப்பட்டது
என் மடி மேல் அமர்ந்து
என் தசைகளை தின்றழிக்கும் இன்று....

முப்பதுக்கு மேல் அதை நான்
மூர்ச்சையாக்க எண்ண
ஏனோ அது உயிர்தெழுந்து தொலைகின்றது....

இம்மிருகம் நான் கொல்வேனோ??
இல்லை மிருகம் எனை கொல்லுமோ?

உயிர் குடித்தல்!!!!

2009-08-19T09:54:00.000-07:00

அந்த வாகனக்காற்று

அளாவியதில்

தொங்குநிலைஎன் உடல் அசைந்தது

விழிப்புற்றேன்

சோம்பல் முறிய

கொதிக்கும் தார் மணத்தால்

சூழப்பட்டிருந்தேன்

காற்றின் வெக்கை

கை கால் உதைத்தேன் காற்றுவெளியில்

அழத்தொடங்கினேன்

எங்கே அவள் ?

என் உணர்ச்சி புரியாதவளா ?

இல்லையே ?!

என்னுயிரின் வலியையே உணர்பவளாயிற்றே ?!

வருகிறாள் வருகிறாள்

அவளுக்கு இடம் மாற்றப்பட்டேன்

ஊசி முனைத்துவாரவழி

முறிந்த இரத்தத்தை

என்னுள் புகட்டும் ஆயத்தம்

ஆமாம் !

என்னுள் புதைந்த

சுரபி வழி

அவள் உயிர் குடிக்கும் முயற்சியில் நான் !!!!!!!!!

அடிப்பாவி !!!!!!!

உன் வறுமையின் சாரத்தை எல்லாம்

இங்கேயா இறக்கி வைத்திரு க்கிறாய் !!!!!!!!!!!!!!!????????????????????????

சண்டாளி !!!!!!

திரவமே இல்லையேடி

அவளுக்கு எட்டவில்லை

என்னவோ முணுமுணுக்கிறாள் !

"பாவி பயலுவோ இத கூட

கண்ணு வாங்காம "

நான் உயிர் குடிக்கும்

முயற்ச்சியில் தீவிரமாய் இருந்தேன் ...

பி.கு : சில கவிதைகள் மனதை விட்டு அகலாது இது நான் மிகவும் ரசித்த கவிதை இந்த வலையுலகத்தை எனக்கு அறிமுகப்படுத்திய என் உடன் பிறவா சகோதரர் பாலாவின் கவிதை.

அவர் வலைத்தளம் கடல் புறா

அக்னி(அன்பு) மழை....

2009-08-18T06:18:00.000-07:00

இன்று அழகிய நந்தவனமாய் காட்சியளிக்கும்
இதே வையம் தான் அவ்வப்போது நடுங்கி
பல்லாயிரக்கணக்கான உயிர்களை
பழிவாங்கியது

அமைதியாய் ஆர்ப்பரிக்கும் இந்த ஆழிதான்
அன்று பொங்கி பிராவாகித்து
பலரை கொன்று குவித்தது

நீல நிறத்தில் ரம்யமாய் மிளிரும் இவ்வானம்தான்
சில நேரங்களில் கனமழை பொழிந்து
எத்தனையோ பேரை காவுகொண்டது

தென்றலாய் என் வாசலில் நிற்கும் குளிர்காற்று
தான் ஊழியாய் அன்று ஊரை சூறையாடியது
ஆனால் இவை எதையும்
என்னால் வெறுக்க முடிவதில்லை

அதே போல் அவ்வப்போது
எரிமலையாய் வெடித்து என் மேல்
வார்த்தைகளில் அமிலம் தோய்த்து
அக்னி மழை பொழியும் உன்னையும்.......

ஜெயிக்க போவது யாரு??

2009-08-17T11:31:00.000-07:00

என்ன இது சின்னபிள்ளைத்தனமான கேள்வின்னு நினைக்கலாம் நீங்க???

ஆனால் இது நாளை நடைபெறபோகும் இடைத்தேர்தலுக்கான கேள்வி

யார் ஜெயிக்க போவது???

சமபலம் உள்ள எதிர்கட்சி தோல்விக்கு பயந்து ஒளிந்து கொள்ள

ஆளும்கட்சிக்கு அடிக்கப்போகின்றது ஜாக்பாட்

கூடவே அக்கட்சியின் தொண்டர்கள்

ஆற்றியிருக்கும் களப்பணி அத்தனை அற்புதமானது. வீடு வீடாக ஒருஓட்டிற்கு

ரூபாய் 200 வினியோகித்துள்ளார்கள் . மேலும் கடந்த 15 நாளாக சும்மா

பணத்தை தண்ணீராக வாரி இறைத்து வாக்காளர்களை போதை மழையில்

நனைத்து உள்ளனர் .அவ்வப்போது விருந்து வேறு கனஜோராய்

இது போதாதா இவர்கள் ஜெயிப்பதற்கு???

இதில் ஒரு நகைச்சுவை என்னவென்றால் எதிர்கட்சியின் முக்கிய

பொறுப்பாளர் வீட்டிற்கு சென்று ஓட்டை விலைபேசி தர்ம அடி வாங்கி

திரும்பிள்ளனர் சிலர் பாவம் பரிதாபத்துக்குரிய தொண்டர் குழாம்.

ஒரு ரூபாய்க்கு அரிசி என பெரிதாய் பெருமையுடன் கூறியவர்கள். இப்பொழுது

விண்ணை தொடும் வேகத்தில் உயர்ந்து கொண்டிருக்கும் விலை வாசி

உயர்வுக்கு என்ன பதில் சொல்ல போகிறார்கள்???

சிலர் கூறலாம் விலைவாசி உயர்வுக்கு இவர்கள் என்ன செய்யமுடியும் என்று

இப்பொழுது நடந்து கொண்டிருக்கும் பதுக்கல்களை கட்டுக்குள் கொண்டு

வந்தாலே போதும். ஆனால் கள்ள சந்தை மத்தியில் உள்ளவர்களின்

பேராதரவோடு அல்லவா நடக்கின்றது. இவர்களிடம் காசை வாங்கிக்கொண்டு

ஓட்டளித்த நம் மக்களுக்கு இதுவும் வேண்டும் இன்னமும் வேண்டும்.

உலகளவில் உயர்வாக பேசப்பட்ட இந்திய ஜனநாயக முறைக்கு இப்படி ஒரு

அவல நிலை ஏற்பட்டிருக்க வேண்டாம்.

பணத்திற்கு ஓட்டுரிமையை விற்கும் கேவலமான நிலை. எப்பொழுது தான்

நாம் திருந்த போகின்றோம் என தெரியவில்லை????

காமராஜர், அண்ணா போன்ற பெருந்தலைவர்கள் இருந்த நாடு ஆனால்

இப்பொழுது பாவம் பதவி வெறி பிடித்த சிலரால் படாத பாடு

பட்டுக்கொண்டிருக்கின்றது.....

என்று கிடைக்கும் இவர்கள் அனைவரிடமிருந்து மீண்டும் ஒரு சுதந்திரம்???

காணவில்லை!!!

2009-08-16T19:06:00.000-07:00

ஜமால் அண்ணாவின் தளம் சென்ற வாரத்தில் காணாமல் போய்விட்டது மிகவும் வேதனைக்குரியது அவரின் புதிய வலைத்தளத்தின் முகவரி
கற்போம் வாருங்கள் பின்தொடர்வோம் நண்பர்களே!!!

அழகிய பிரம்மாக்கள்!!!

2009-08-12T10:29:00.001-07:00

உடைத்தெறியப்பட்ட பொம்மைகள்
கிழித்தெறியப்பட்ட காகிதங்கள்

டோரா புஜ்ஜி ஸ்டிக்கர்களால்
ஓட்டப்பட்ட பீரோ, மேஜைகள்

பென்சில்களாலும் கிரேயான்களாலும்
கிறுக்கப்பட்டு நவீன ஓவியங்களாய்
காட்சியளிக்கும் சுவர்கள் அவ்வப்போது

மரித்துவிடும் என்
மனதை இதழ் அமுதத்தாலும்
மழலை மொழியாலும் உயிர்தெழவைக்கும்

இவர்கள் எனக்கே எனக்காய்
அற்புதமானதொரு உலகை படைக்கும்
அழகிய பிரம்மாக்கள்.......

வண்ணத்துப்பூச்சியின் கனவு....

2009-08-10T11:26:00.000-07:00

வானம் முழுவதையும் தன் வசப்படுத்த நினைத்த
வண்ணத்துப்பூச்சியின் சிறகை பறித்துவிட்டார்கள்
சிறையில் அடைத்துவிட்டார்கள்....

ஜந்தும் பத்துமாய் அவள் சேர்த்து வாங்கிய
ஆக்ஸ்போர்டு அகராதி இப்போது
காகிதக்கப்பலாகி அவள் கண்ணீரில் மிதக்கின்றது....

பத்தாம் வகுப்பில் அவள் அணிந்த
சாயம் சற்று வெளிறிய சீருடை தாவணி
அவள் பிள்ளைக்கு தொட்டில் சீலையாகபோகின்றது.....

கால் பவுன் தங்கத்தாலும்
சிறு கயிற்றாலும் அவளின்
கல்லூரி கனவுகள் கலைக்கப்பட்டது
கற்பனைகள் சிதறடிக்கப்பட்டது....

இந்த கனவை அவள் சொல்லப்போவதுமில்லை....
சொன்னாலும் யாருக்கும் புரியப்போவதுமில்லை....

ரகசியமானது காதல்!!!

2009-08-07T10:55:00.000-07:00

சுவைகுறைந்த என் சமையலை நீ
சுவைத்து உண்பாய் அதன் உண்மை
சுவை நானறிந்த போது உன்
கன்னத்தில் இதழ் பதிக்க தோன்றும்!!!

யாவரும் கூடி நிற்கும் சபையில்
என்னை ரகசியமாய் நீ பெயரிட்டு
அழைக்கையில் உன் தோள் வளைவில்
முகம் சாய்க்க தோன்றும்!!!

உன் மேல் நான் கொண்ட காதல்
ஊமையாய் என் மனம் முழுவதும் வியாபித்திருக்க
உன் சாயல் கொண்டு பிறந்த நம் மழலையோ அதை
உலகறியச் செய்திடும்!!!

வல்லமை தாராயோ !!!!

2009-08-04T10:29:00.000-07:00

அகதியாய் அலைந்து உயிர் பிழைக்கவும்
பதுங்கு குழியில் பதுங்கிடவும்

நண்பர்களின் சடலங்களை நாய் நரிகள்
பங்கிடுவதை பார்த்திடவும்

மழலைகளின் மரணங்களை கண்டு
மனம் தளராதிருக்கவும்

கற்பு நெறிகள் கயவர்களால்
காற்றில் கரைவதைகண்டும்

செம்புனல் கண்டு சிதறாமலும்
வன்கொடுமை கண்டு வளையாமலும்

இருக்க வல்லமை தாராயோ!!!!!!!

யுத்த பூமி

பிறப்பதும் வளர்வதும் பின்னர் மூப்புவந்து
இறப்பதும் வையத்து வாழ்வு
பிறப்பதே இறப்பதற்கு என்பது என்ன வாழ்வு

முழவொலி விழவொலி மென்சிறார் மழவொலி
பாட்டொலி உழவொலி இங்கு இல்லை
மறலி கண்டு கதறிய மரணஒலி மட்டும் இஙகு உண்டு

புத்தனின் வழியில் வந்தவன் எங்கள் ரத்ததில் குளிக்கிறான்
இங்கு நதிகள் எங்கள் உதிரத்தால் சிகப்பானது
இங்கு மரங்களுக்கு எங்கள் பிணங்கள் உரமானது

இது யுத்த பூமி எங்கேடா சாமி???

கரியும் வைரமாகும்

கூழாங்கல் கரியை கண்டது
கர்வத்தில் சிரித்தது
கரி தன்னை பூமியில் புதைத்தது
காலத்தின் கோலம் கரிகட்டையாய் நாம்

பூமிக்குள் புதையும் என் இனம்
யுகங்கள் கழியும்
மண்ணில் புதைந்த மக்களும்
கரியும் வைரம் ஆகும்

இறைமை கரி கட்டையின் பொறுமைக்கு
அதை வைரம் ஆக்கும்
ஆனால் கூழாங்கலே
எங்கள் கால்களில் மிதி படத்தான் போகிறாய்

எம்மை கண்டு எள்ளி நகை ஆடும்
அனைவருக்கும் இது பொருந்தும்

நிறுத்துங்கள் தோழர்களே

உதித்திடும் செங்கதிரோன் எங்கள்
உள்ளத்து துயர் துடைப்பான் என எண்ணினோம்

அருணனும் எங்கள் நிலை கண்டு அழுதிடும்
பரிதியும் எங்கள் நிலை கண்டு பதறிடும் என நம்பினோம்

ஆழி அழித்தது ஆள்பவனும் அழிக்கிறான்
அண்டைய நாடும் சேர்ந்து அழிக்கும்

ஆதரவு கேட்டால் அவரவர் உடலை தீயில் இடுகின்றனர்
இங்கு நாங்கள் எரிவது போதாதா?? அங்குமா எரிவ‌து???

போதும் சகோதரா நிறுத்து உன் தீக்குளிப்பை
இதுவல்ல நாங்கள் உம்மிடம் கேட்பது

பி.கு : நான் பதிவுலகத்திற்கு வந்த புதிதில் என் மக்களுக்காக ஆதங்கத்துடன் எழுதிய கவிகளில் சில உங்கள் பார்வைக்கு சிலர் உங்களின் பழைய பதிவுகளை தவற விட்டுவிட்டோம் என கேட்டுக்கொண்டதற்க்காக மீண்டும் என் மற்றொரு வலைதளத்தில் இருந்த கவிதையை இங்கு பதிவிடுகிறேன்......

ஒரு நல்ல சேதி நண்பர்களே!!!

2009-08-02T19:23:00.000-07:00

இத்தனை நாளாய் நான் எழுதி வரும் கவிதைகளை, கவிதை மாதிரி உள்ள கட்டுரைகளையும் பாராட்டி பின்னூட்டமிட்டு வரும் சகோதர சகோதரிகளே!!!

உங்களுக்கு ஒரு நல்ல சேதி கொலை வெறி கவிதை (கவுஜ) அதிகம் எழுதி உங்களை ஆனந்த கண்ணீரில் ஆழ்த்திய இந்த வீட்டுப்புறா இனி சில கட்டுரைகளும் எழுத உள்ளது.ஆனால் இந்த தளத்தில் அல்ல தமிழர் உணர்வுகள் எனும் என் முதல் தளத்தில்......

இன்று முதல் தமிழர் உணர்வுகள் எனும் அந்த தளம் சக்தியின் உணர்வுகள் என பெயர் மாற்றம் செய்யப்படுகின்றது அதில்,அரசியல்,ஆன்மீகம்,யோகம்,தியானம்,ரங்கமணிபதிவுகள் என இன்னும் எனக்கு என்னவெல்லாம் தோன்றுகின்றதோ அதை என் நண்பர்களுடன் பகிர்ந்து கொள்ள போகின்றேன்.

அதில் முதல் பதிவு நம்ம ஊர் விஞ்ஞானி மயில்சாமி அண்ணாதுரை அவர்களுக்கு வாழ்த்துக்களை தெரிவித்து எழுதப்பட்டு உள்ளது வலையுலகத்தில் உள்ள என் நண்பர்களே அந்த மிகப்பெரும் விஞ்ஞானிக்கு நீங்களும் உங்கள் வாழ்த்துக்களை தெரிவியுங்கள்.....

அன்னையின் பொன்மொழிகள்....

2009-07-30T09:11:00.000-07:00

வாழ்கையின் சிந்தனை மிகுந்த நேரங்களையும்,
நோய்களையும் வேதனைகளையும்
ஒதுங்கி நின்று பார்க்க கற்றுக்கொள்ளுங்கள்.
அவை எல்லாம் உருமாறி விடக்கூடிய
ஒன்று என்பதை உணருங்கள்.....

வெயிலும் கடுமையும் வந்தால்
குளிரும் மழையும் வரக்காத்திருக்கின்றது
என்பதை அறீவீர்கள்.....

துன்பத்தை கண்டு துவண்டு விடாதீர்கள்.
துன்பத்தை தொடர்ந்து இன்பமும்
வரத்தான் போகின்றது என்பதை
எண்ணி ஆறுதல் அடையுங்கள்....

வாழ்கையை மிகத்தீவிரமாக ஏற்றுக்கொள்ளும்
மனிதர்களிடம் பழகாதீர்கள்....
உங்களை சுற்றியுள்ள சூழ்நிலை
உங்களை நெருக்குவதாக நினைக்காதீர்கள்
எல்லாவற்றையும் எளிமையாக லேசாக ஏற்கத்தயாராகுங்கள்....

ஆண்டவன் லீலைகளில் மகிழ்ச்சி அடைபவன்
ஆண்டவன் வைக்கும் சோதனைகளை
எல்லாம் விளையாட்டாக எடுத்துக்கொள்ளுங்கள்....

சிரிக்க கற்றுக்கொள்ளுங்கள்
உள்ளத்தில் இருக்கும் வேதனைகளையும்
வீணான பயத்தையும் தூக்கி எறியுங்கள்
வெற்றியும் மகிழ்ச்சியும் மனப்பக்குவமும்
அடைய இதுவே சிறந்த வழி.....

மனம் -- மணம்

2009-07-28T03:23:00.000-07:00

சீயக்காய் தோய்த்த குழல்
செஞ்சாந்து திலகமிட்ட முகம்
நலங்கு மாவின் நறுமணமும்
சமையலறையின் கலவையான வாசத்துடன்
முந்தானை சூட்டில் எனை
உறங்க வைத்த அன்னையின் மணம்......

பழுப்பேறிய வெண்மையிலான உடை
உழைப்பின் பரிசான வியர்வை வாசத்துடன்
வாரியணைத்தவரின் அணைப்பில்
நுரையீரலை நிறைத்த அப்பாவின் மணம்.....

மஞ்சள் சரட்டின் சுகந்தத்துடனும்
நெற்றி வகிட்டில் நிறைத்த குங்குமத்துடனும்
அவன் மார்பில் சாய்ந்திருக்கும் வேளையில்
என் சுவாசத்தில் சங்கமிக்கும்
அவனுக்கேயுரிய பிரத்யேகமான மணம்......

என எத்தனையோ மணம்
நினைவுக்குமிழ்களாய் இருப்பினும்
என் மகவினை ஈன்றெடுத்த போழ்தில்
பல ஹார்மோன்களின் உதவியுடன்
பாசத்தின் வெளிப்பாடாய்
எனக்குள் வெளிப்பட்ட
தாய்மையின் மணமே தனி மணம்...... .

இனிய பிறந்த நாள் வாழ்த்துக்கள் ஜமால் அண்ணா!!!!

2009-07-26T14:41:00.001-07:00

இணையத்தில் எமக்கு கிடைத்த
இனிய தோழமைக்கு என்
இனிய பிறந்த நாள் நல்வாழ்த்துக்கள்!!!!

நட்பிற்கு ஒரு இலக்கணமாய்
வரைமுறைக்குட்பட்ட நட்பாய்
நட்பான நட்பாய் வாழும் ஜமால் அண்ணா!!!
Happy Birthday To You!!!!

வாழ்க நீவீர் வாழ்கை என்ற கடலில்
மகிழ்ச்சி என்ற படகில்
வாழ்நாளெல்லாம் பவனி வந்து!!!
வளம் பல பெற்று!!!
வாழ்க நீடுழி!!!
வளர்க வையத்தில் நின் புகழ்!!!!

நல்வாழ்த்துக்களுடன்
சக்தி

.

ஒரு ஆலமரத்தின் கதை....

2009-07-25T11:35:00.000-07:00

ஒரு பசுமை நிறைந்த ஆலமரம் இது
இழைகளாலும் தழைகளாலும் அம்மரம்
சூழப்பட்டிருந்த வரை.....

அங்கு குயில்கள் கூவியது
கிளிகள் பாடியது
பல பறவைகள் கூடு கொண்டு
தன் இணையுடன் மகிழ்ந்திருந்தது....

இயற்கையின் விதியால் தன்
இலைகளை உதிர்த்து அது
பட்டுப்போகின்ற சூழலில் நின்றபோழ்து....

அதற்கு ஆறுதல் கூற யாருமில்லை
ஆனால் அதன் விழுதுகள்
அதை எப்போதும் தாங்கி நிற்கும்
அவை இற்றுப்போகின்ற வரையிலும்....

.

தொப்பூள் கொடி சொந்தங்களை நம்பாதீர்கள்....

2009-07-21T14:31:00.000-07:00

ஆண்களின் ரத்தத்தால் இந்த கடல் சிவப்பாகட்டும்
பெண்களின் கற்பு எங்கள் வீரர்களுக்கு விருந்தாகட்டும்
என சிங்களவன் கொக்கரித்தபோது
கொப்பளித்த என் கோபத்தை
கொட்டிவைக்க இடமின்றி குமறித்தான் போனேன்....

அங்கே கொட்டியிருக்கும் ரத்தத்தை மண் உறியவே
இன்னும் எத்தனையோ நாட்களாகும் என கூறுகின்றனரே
அந்த மண்ணின் ரத்தவெறி தீர்ந்ததா????
இல்லை இன்னும் முகாம்களில் வெறிபிடித்த மிருகங்களால்
வதைக்கப்பட்டு சிதைக்கப்படுவோரின் ரத்தமும் வேண்டுமா???

அவர்களின் கொடூர செய்கைகளை கண்டு
வேதனையில் வெம்பியபடி
எங்கள் நாட்டில் உங்கள் நிலையை
சற்றே யோசித்துபார்க்கிறேன்...

ஆயிரக்கணக்கான உயிர்கள்
அங்கு பலியானபோது இங்கு யாரும்
அதிகமாய் அழுததாய் தெரியவில்லை
ஆனால் ட்வென்டி ட்வென்டி உலகக்கோப்பையை
எங்கள் நாடு வெல்லவில்லையே என சற்று அதீதமாய் அழுதோம்.....

ஆனால் ஒன்று மட்டும் உறுதி
அங்கு நடக்கும் கொடுமைகளை கண்டு
கவிதை வடிப்போம், கதை எழுதுவோம்
கட்டுரைகளில் கிழி கிழியென கிழிப்போம் ....

அதே சமயத்தில்தப்பி தவறி எங்கள் பேச்சை நம்பி நீங்கள்
தொப்பூள் கொடி சொந்தமிது என இங்கு வந்தீர்களானால்
உங்களுக்கு அகதிகள் என பட்டமும் அளிப்போம்....

சுவாரஸ்ய பதிவர் விருது ......

2009-07-18T19:24:00.000-07:00

என் தளத்திற்கு சுவாரஸ்ய பதிவர் விருதளித்த

சகோதரர் நவாஸ் அண்ணாவிற்கும் ,

சகோதரர் ஷ‌ஃபிக்ஸ்,

சகோதரி இயற்கை மகள்,

சகோதரி ஜெஸ்வந்தி

ஆகியோருக்கு எனது நன்றிகள் பல.......

சில நாட்களுக்குள்ளே இந்த விருது இல்லாத தளமே இல்லை எனும் அளவிற்கு இவ்விருது அனைவருக்கும் அளிக்கப்பட்டுள்ளது கண்டு மிக்க மகிழ்ச்சி....

எனக்களித்த இவ்விருதை இவர்கள் ஆறு பேருக்கும் பகிர்ந்து அளிக்க விரும்புகிறேன்.....

திகழ்மிளிரார்

ஹம்மிங் பேர்ட் அசீ

ஸ்வீட் ப்ரீஸ் சக்திகுமார்

பாமரன் பக்கங்கள் பாலா

நசரேயன் அண்ணா

கனவுகளின் முகவரியை சொல்லும் ரீனா

.

சீதைகளை சிதையில் ஏற்றாதீர்....

2009-07-12T03:23:00.000-07:00

வீட்டை விட்டு வெளியேறி
அலுவலகம் சென்று மீண்டும்
வீடு திரும்புவதற்குள்
எங்களுக்காய் காத்திருக்கும்
எத்தனையோ வலைவிரிப்புகள்.....

ரோட்சைட் ரோமியோக்களிடமிருந்து
தப்பி திரும்பினால்
பேருந்துகளில் இடிராஜாக்களின் இடிகள்
இவர்கள் செய்கையில்
கற்பு எனும் வஸ்து இருக்குமாயின்
சற்று கலங்கித்தான் போய்விடும்......

அலுவலகங்களில் முகத்தை
இறுக்கி வைத்து கொள்ள வேண்டும்
இல்லையெனில்
பார்த்தால் சிரிக்கும் இவள்
படிந்து விடுவாளோ என
கண்களில் வினாவுடன் சக அலுவலர்கள்......

அத்தனை வலைவிரிப்பிலும் தப்பி
வீடு திரும்புகின்றோம் சீதையாய்
ஆம் எங்கள் கைப்பிடிக்க வரப்போகும்
மணவாளனுக்காய் நாங்கள் சீதைகளாகவே
இருக்கவிரும்புகின்றோம்....

ஆனால்
கரன்சியும் காணமும்
குறைவாய் வரின்
உனக்காய் காத்திருக்கும் சீதைகளை
நீயோ சிதையில் ஏற்றுவதற்கன்றோ
காத்திருக்கின்றாய்.......

குப்பைதொட்டி பெறும் குழந்தைகள்....

2009-07-09T22:53:00.000-07:00

நம்பிக்கைகுரியவர்களே
நல்லவர்களே!!!
நம் நாட்டில் ஜனத்தொகை அதிகம்
என எள்ளி நகையாடி
ஏகடியம் செய்பவர்களுக்கு
தெரிவதில்லை நம் நாட்டில்
பெண்கள் மட்டுமல்ல
பல சமயங்களில்
குப்பை தொட்டிகள் கூட
குழந்தை பெற்றுக்கொள்ளும் என.....

வானத்து மகளே

2009-07-07T19:16:00.000-07:00

ஐந்து இரு மாதங்கள்
அடிவயிறறில உனை தாங்கி
அம்மா என அலறி நான்
ஈன்று எடுத்த தேவதையே

வானவரும் தேவரும் பூ மழை பொழிய
என் இல்லம் வந்த காரிகையே

அஞ்சனைஇல் கண் எழுதி
அல்லி பூ மெத்தைஇட்டு

முத்து சிவிகை உடன்
முல்லை பந்தலில் தொட்டிலிட்டு

நான் காத்து இருக்க
எனை வெறுத்து பூமகளே எங்குசென்றாய்

இழப்பின் வலி என்ன வென்று
எனக்கு உணர்த்த சென்றாயோ

மீளா துயரில் எனை ஆழ்த்தி
மாளா சோகத்தில் எனை வீழ்த்தி....

பி.கு: திகழ்மிளிராரின் தளத்தில் இந்த கவிதையை படித்ததும் எனது மனதில் தோன்றிய என் பழைய கவிதை (மீள்பதிவு)

இதயப்பூவிற்கு இனிய பிறந்த நாள் நல்வாழ்த்துக்கள்.....

2009-07-06T10:46:00.000-07:00

இன்று பிறந்த நாள் காணும்
இயற்கை அன்னையின்
இனியமகளே
இன்றுபோல் என்றும்
எல்லா வளமுடனும நலமுடனும்
வாழ வாழ்த்துக்கள்!!!!

அன்பும் உயர் பண்பும் நிறைந்த
அழகிய தேவதையே!!!

வலைப்பூவில் வாசம் வீசும்
எங்களின் இனிய இதயப்பூவே!!!

பெற்றவர்களுக்கு செல்ல மகள் நீ
நண்பர்களுக்கு நல்ல தோழி நீ
கற்பவர்களுக்கு கலைமகள் நீ
சக்திமிக்க அலைமகள் நீ
என்றும் திருமகளாய் நீ வாழ்க!!!

தோன்றின் புகலொடு தோன்றுக வென்னும்
தொன்முறை கூறும் நன்மக வாய்
நோன்பிற் பிறந்த விழாகண்டாய்
நூறாண்டு காலம் வாழியவே!!!!

என்றும் மறவேன் உங்கள் அன்பை....

2009-07-06T03:09:00.000-07:00

என் வாழ்வு பூமிப்பந்தில் துவங்கிய நாள் இன்று
இதுவரை பெரிதாய் சாதித்துவிட்டதாய் நினைக்கவில்லை
ஆனால் முகம் கூட பார்த்தறியாத எனக்காய்
வாழ்த்துமழையும் கவிதை மழையும் பொழிந்து
என் மனதை நெகிழச்செய்த
என் உடன் பிறவா சகோதர சகோதரிகளுக்கு என் நன்றிகள்....

நன்றி இயற்கை மகள், தமிழரசி

Orkut , Face book, E- greetings, Gmail போன்றவற்றில்
வாழ்த்து தெரிவித்தவர்களுக்கும் என் உளமார்ந்த நன்றிகள்....

வரைமுறையின்றி தலைமுறைக்கும் தொடரவேண்டும்
உங்களின் இந்த அன்பு பந்தம்
உயிர்குதிரையேறி விண்ணுலகும் ஏகும் வரை
உங்கள் அன்பை என்றும் மறவாது என் நெஞ்சம்.....

*

நலம் வாழ எந்நாளும் நல்வாழ்த்துக்கள்!!!

2009-07-03T03:12:00.000-07:00

என் அன்பு மகன் பாலாஜிக்கு
இனிய பிறந்த நாள் நல்வாழ்த்துக்கள்!!!!

தாய்மை எனும் பேரின்பத்தை எனக்களித்தாய்!!!
தாலாட்டு பாடும் வரத்தையும் தந்திட்டாய்!!!

எத்தனையோ வருடங்கள்
நான் செய்த தவத்தின் பலனாய்
என் மடி சேர்ந்த அழகு பொக்கிஷமே!!!

ஆயிரமாயிரம் ஆண்டுகள் நீ வாழவேண்டும் இந்த
அன்னையின் ஆயுளும் உன்னையே சேரவேண்டும்!!!!

வாழ்க வளமுடன்!!!

என் செல்லத்துக்கு எனக்கு முன்பே வாழ்த்து தெரிவித்து அழகியதொரு பதிவு இட்டிருக்கும் என் சகோதரி இயற்கை மகள்க்கு என் நன்றிகள்!!!

உனக்காய் ஒரு அழகிய பிரபஞ்சம்......

2009-07-02T00:09:00.000-07:00

எனக்குள் ஒரு அழகிய பிரபஞ்சம்
உனக்காய் உருவானது!!!

என் விரல் தொடும் தூரத்தில் விண்மீண்கள் காத்திருக்க
அங்கும் என் விரல் படா தூரத்திலேயே நீ இருக்கின்றாய்!!!

மொட்டவிழ்கின்ற மலர்களை நான் ரசித்திட்டபோதும்
மழைசாரலில் துளைந்து வியர்த்திட்டபோதும்
சத்தமின்றி நீ சிரித்த சிரிப்பின் ஞாபகத்தில்
சிக்கி சித்தம் மறந்து சிலிர்க்கின்றேன்!!!!

நீள் விசும்பினிடை நீந்தும்
நிலவின் மொழியும்
நட்சத்திரங்களின் முணுமுணுப்பும் கேட்டு
நிம்மதியிழந்து தவிக்கின்றேன்
உன் நேசமுகம் காணாத போழ்துகளில்!!!!

உன் காலடியோசை கேட்டால் மட்டுமே
சப்திப்பேன் என மெளனவிரதமிருக்கும்
என் கொலுசுகளின் இசை மீண்டும் நான்
கேட்க நீ வரவேண்டும்!!!!

கல்வி கட்டணங்களிலிருந்து எங்களை காப்பாற்றபோவது யார்???

2009-06-24T04:26:00.000-07:00

ஆயகலைகள் அறுபத்து நான்கோடு
அறுபத்தைந்தாய் ஆங்கிலமொழி கல்வி என்று சேர்ந்ததோ
அப்போது ஆரம்பித்தது எங்களின் அவஸ்தை....

அனைத்து பெற்றோர்களுமே
ஆங்கில மீடியத்தில் எங்கள்
அன்பு செல்வங்களை சேர்க்க
ஆசை கொள்கின்றோம்....

கான்வென்ட்களின் வாசல்களில் தவமிருக்கின்றோம் விளைவு
கல்வி நிறுவனங்கள் கமர்சியல் சென்டர்களாகிவிட்டது

L.K.G. யில் சேர்க்க 50000 நன்கொடை அதிலிருத்து
பொறியியல் கல்லூரிக்கு 15 லகரம் வரை
என தாரை வார்க்கின்றோம்.....

எங்களின் எதிர்கால கனவுகள்
நிஜமாகிட வேண்டும் என
நிகழ்காலத்தில் நிம்மதியிழந்து தவிக்கும்...

எங்களை கல்வி கட்டணங்களிலிருந்து
காப்பாற்றபோவது யார்????

தேவதைகளின் தேவதைகள்....

2009-06-22T16:36:00.001-07:00

சில படங்கள் பார்க்கும் போதே மனதை மயக்கிடும்

என்னை கவர்ந்த இந்த புகைப்படங்கள் உங்களுக்காக.....

என்னை வினாக்குறியாக்கிய ஆச்சரியக்குறியே பதில் சொல்வாயா???

2009-06-20T02:13:00.000-07:00

அன்னையின் வயிற்றில் சூல் கொண்டபோது
அறியவில்லை உனக்காக தான் உருவாகின்றேன் என்று!!!

மழலையாய் எனை கையிலேந்தி கொஞ்சி
மகிழ்ந்தபோது நீயும் அறியவில்லை
நான் தான் உன் துணையென்று!!!

காற்றை பார்த்ததும் இலைகள் படபடக்கும் ஆனந்தத்தில்
உனை கண்டதும் என்னிதயம் துடிக்கின்றதே அதே லயத்தில்!!!

ஏன் இந்த இதயவேதனையை
எனக்கு பரிசளித்தாய்??? என்னவனே!!!

உன் ஒவ்வொரு தீண்டலிலும்
எனக்குள் ஏதோ ஒரு நெருப்பை ஏற்றிவைக்கின்றாய்
எல்லா நரம்புகளையும் வியர்க்க வைக்கின்றாய்!!!

என்
அடிமனதை அகழ்ந்து அகழ்ந்து
ஆராய்ந்து பார்க்கின்றேன்
உன்னிடம் மயக்கம் கொள்ள காரணம்
என்னவென்று???

முகிலுக்குள் புகுந்து வெண்ணிலா வெளியேறும்
நேரத்திற்குள் என் உயிரை இப்புறம் துளைத்து
அப்புறம் வெளியேறும்
அசகாய அஸ்திவாரமான உன் விழிப்பார்வையிலா??? இல்லை

காற்றை கூட கிறக்கம் கொள்ளவைத்து என்
காதுகளை ஊடுருவும் உன்
காதல் மொழி பாஷைகளிலா???

எதை கண்டு உன்னிடம் மயக்கம் கொள்கிறேன்
எனை வினாக்குறியாக்கிய ஆச்சரியக்குறியே பதில் சொல்வாயா???

(பி.கு) இன்று பிறந்த நாள் காணும் என்னவனுக்காக ஒரு சின்ன கவிதை

காத்திருக்கிறேன் அவனுக்காய்.....

2009-06-16T08:55:00.000-07:00

எவனைக்கண்டால் கண்கள் தமை மறந்து
இமைக்கமறுக்கின்றதோ
எவனின் பிம்பம் எனக்கு பதிலாய் கண்ணாடியில் தெரிகின்றதோ....

எவனைக்கண்டால் என் எலும்புக்குள்ளும் மஜ்ஜைக்குள்ளும்
எதிர்பாராத குளிர் உண்டாகி
எல்லா உறுப்புகளின் இயக்கமும் தடைபடுகின்றதோ.....

எவனின் சுவாசகரிமிலவாயு கூட கமகமக்கின்றதோ....
எவனைக்கண்டால் காரணமேயில்லாமல் நாணம் கொள்கிறேனோ....

எவனைக்காணும் போது வெளிச்சமும் காணாதபோது இருளும் எனை சூழ்கின்றதோ...

எவன் விலகிச்சென்றாலும் என்னுள் விஸ்வரூபம் எடுக்கின்றானோ
காத்திருக்கின்றேன் அவனுக்காய்
என் காதலும் கவிதையும் புரியப்போகும் நாளுக்காய்.....

இவர்களா இறைவனின் அவதாரங்கள்???

2009-06-15T17:55:00.000-07:00

ஒரு சில மனிதர்கள் தாங்கள் தான் கடவுளின் அவதாரங்கள்
என பிதற்றுவதையும் அவர்களை நம்பி
லட்சோபலட்சம் மக்கள் தங்கள் பணத்தையும் பொருட்களையும்
வாரியிறைக்கும் முட்டாள்தனத்தையும் கண்டு மனம் வெதும்பி கேட்கிறேன்

யார் இறைவனின் அவதாரங்கள்???
தங்களை ஆண்டவனின் அடுத்தவாரிசு என கூறும்
இவர்கள் எல்லாம் இத்தனை வருடங்களாய் எங்கிருந்தனர்??

இவர்களுக்கு அத்தனை வலிமையுண்டென்றால்
இவர்களால் ஏன் நிறுத்தமுடியவில்லை
பெருகிவரும் கொலைகளை, கொள்ளைகளை
தொடரும் கற்பழிப்புகளை, லட்சக்கணக்கில் புதைக்குழிக்குள்ளும்
போரிலும் செத்துக்கொண்டிருக்கும் என் இனமக்களை???

ஆழிதனது அகலவாயை திறந்து
ஆயிரமாயிரம் உயிர்களை உள்வாங்கியதே
அப்பொழுது எங்கிருந்தார்கள் இந்த
அவதாரபுருஷர்கள் ஒரு அபாயமணி கூட அடிக்காமல் ???

ஏழைக்கு இரங்காது இரும்பு மனம் கொண்டு
ஏதோ ஒரு மடாதிபதிக்கும் போலிச்சாமியாருக்கும்
சாமரம் வீசுபவர்களே புறந்தள்ளுங்களேன் இந்த போலிகளை!!!

நமக்குபின் தோன்றிய எத்தனையோ மதங்கள்
மனித நேயமும் , மக்கள் சேவையும் என உயர்ந்துகொண்டுள்ளது
நாம் மட்டும் இறைவனை உணர்வதற்கு
இன்னமும் இடைதரகர்களை நம்பிக்கொண்டிருக்கின்றோம்
நாம் வெட்கித்தலைகுனியவேண்டிய வெட்கக்கேடல்லவா இது???

யோசித்துபாருங்கள் படங்களிலிருந்து
விபூதியும் குங்கும மழையும் பொழிகின்றதாம்!!!!
அதற்கு பதிலாய் அவர்களை
பொற்காசுகளும் நவமணிகளுமாய் பொழியச்சொல்லுங்கள்
உங்கள் பொருளாதாரமாவது உயரட்டும்!!!!!

நான் நாத்திகவாதி அல்ல ஆனால் இவர்களை வழிபட்டால் தான்
நான் ஆத்திகவாதி என்றால் நான் ஆத்திகவாதியும் அல்ல
உங்களை பொறுத்தவரை நான் விதண்டாவாதியாகவே இருந்துவிடுகிறேன்!!!!

என்ன பதில் சொல்லபோகின்றோம்????

2009-06-04T02:55:00.000-07:00

உலக வெப்பமயமாதலால்
உருகிக் கொண்டிருக்கும் பனிப்பாறைகள்.....

குறைந்து கொண்டிருக்கும் நிலப்பரப்பு
குறைக்கவே முடியாத மக்கள் தொகை பெருக்கம்....

ஆயிரமாயிரம் ஆண்டுகள்
அழகாய் இருந்த பூமியை
அரை நூற்றாண்டுக்குள் சேதப்படுத்தியாயிற்று.....

காற்றுப் பெண்ணின் முகத்தை
கரிப்புன்னகையினால் கறைப்படுத்தியாயிற்று....

பெட்ரோலிய பொருட்களை
பெருமளவில் தீர்த்தாயிற்று....

இயற்கை அன்னையின் செல்வங்களை
இயன்ற அளவு அழித்தாயிற்று....

விளை நிலங்களை வந்த
விலைபேசி விற்றாயிற்று....

கான்கீரிட் காடுகளை
கண்மண் தெரியாமல் பெருக்கியாயிற்று....

நமக்கு முந்தைய தலைமுறையினர்
நமக்கு தந்த வளங்களை
நாமே முடிந்தளவு சுரண்டியாயிற்று....

அடுத்த தலைமுறையினர்

எங்களுக்கு என்ன மீதம் வைத்தாய்
என கேட்கப்போகும் கேள்விக்கு
என்ன பதில் சொல்லபோகின்றோம்????

உனக்கான என் கவிதை....

2009-05-30T11:21:00.000-07:00

எனக்கான கவிதை
எங்கென
எனைக்கேட்கும்
என்னவனே...

உனக்கான கவிதை
கற்பனையில் உதித்து
காகிதத்திலா எழுதப்படும்??

என் மருளும் கண்களுக்குள்
உருளும் கண்மணிகள் சொல்லும்
உனக்கான என் கவிதையை....

உனை தொட்டும் தொடாமலும்
பட்டும் படாமலும் வருடிச் செல்லும்
என் வெப்பமூச்சுக்காற்று சொல்லிடும்
உனக்கான என் கவிதையை....

நிலா கள் ஊற்றும்
நள்ளிரவில்
காற்றில் அலைந்து திரியும்
என் கைகளுனை காணாது
கண்ணீர் விடும்....

மனம் லட்ச லட்சமான
சிக்கலில் பின்னிக்கொள்ளும்
உணர்வுகளின் இயக்கம் அறுந்து போகும்
எனை மெளனத்திற்குள்
புதைத்து கொள்ளத் தோன்றும்
உன் நினைவுகளில்
பல மின்னல் மனதிற்குள் மின்ன...

காதலெனும் கனமழைக்குள் சிக்கி
கரைந்து கரைந்து
காணாமல் போகின்றேனே இது கூட
காதல் கவிதை தானே....

என் இன்னுயிரே
உனை கண்டதும்
வெடித்த கொடிப்பூவாய்
உன்னில் படர்ந்து
விக்கித்து விதிர்த்து
வியர்த்து போகின்றேனே
விளங்கிடவில்லையா
இந்த நொடி
காதலாய் கவிதையாய் உனக்கு....

இதற்கு மேல்
இதை விளக்கிட
இனி வார்த்தையொன்றுமில்லை எனக்கு...

சக்தியின் மறுபக்கம்.....

2009-05-26T20:20:00.000-07:00

1 . உங்களுக்கு ஏன் இந்தப் பெயர் வந்தது? உங்களுக்கு உங்க பெயர் பிடிக்குமா ?

சக்தி என் கணவரின் பெயர் +எங்கள் நிறுவனங்களின் பெயரும் கூட

பெயரை சொல்லும் போதே சக்தி வருதில்லை!!!! அதனால் எனக்கும் இந்த பெயர் .......

பிடிக்கும்பா..... என் நிஜப்பெயர் தமிழ்செல்வி

2.கடைசியாக அழுதது எப்பொழுது?

கடந்த செவ்வாய் மாமனாரின் மறைவன்று!!!!!

3.உங்களோட கையெழுத்து உங்களுக்கு பிடிக்குமா?

ரொம்ப ரொம்ப பிடிக்கும். கட்டுரை போட்டிகளில் சில பரிசகள் வாங்கி

இருக்கேன் என் கையெழுத்துக்காகவே!!!!!

4).பிடித்த மதிய உணவு என்ன?

பள்ளி நாட்களில் ஒரு 20 பேர் ஒன்றாய் அமர்ந்து உணவருந்தி இருக்கின்றோம்

இன்றும் மனதில் அதன் சுவை என்றும் இனி வராது

அம்மாவின் கைமணத்தில் அத்தையின் கைமணத்தில் எதுவாயிருந்தாலும்

ரொம்ப ரொம்ப பிடித்தம் பிரியாணி,மீன்குழம்பு.

நீங்க சமைக்கமாட்டீங்களானு கேட்பது காதில் விழுகின்றது

சமையலறைக்கு நான் சாப்பிட மட்டுமே போவது வழக்கம்

மீறி சென்றாலும் அம்மா தாயே வேண்டாம் இந்த விஷப் பரீட்சைன்னு

என்னை துரத்திவிட்டுடறாங்க

5.நீங்கள் வேறு யாருடனாவது உங்களோட நட்பை உடனே வச்சுக்குவீங்களா?

என் மனம் பொறுத்து என் ஆழ்மனத்தின் குரல் கேட்டு நடப்பவள் நான்

என் மனம் சரி என்றால் எனக்கு நண்பர் தான்

6.கடலில் குளிக்க பிடிக்குமா....அருவியில் குளிக்க பிடிக்குமா?

குற்றால அருவி ரொம்ப பிடித்தம், வருடா வருடம் என் உறவினர் படை சூழ

குறைந்த்து 50 பேர் அங்கு படையெடுப்பது வழமை

7.முதலில் ஒருவரைப் பார்க்கும் போது எதை கவனிப்பீர்கள்?

கண், முகம்,

8.உங்க கிட்ட உங்களுக்கு பிடிச்ச விஷயம் என்ன? பிடிக்காத விஷயம் என்ன ?

பிடிச்ச விஷயம்:என் சிரிப்பு,தன்னம்பிக்கை, தப்பு யார் செய்திருந்தாலும் தட்டி கேட்கும் தைரியம்

பிடிக்காத விஷயம் :என் முன்கோபம், சோம்பேறித்தனம், நல்லா வாயை

குடுத்து வாங்கி கட்டிக்கிறது என பல இருக்கின்றது

9.உங்க சரி பாதி கிட்ட உங்களுக்கு பிடித்த பிடிக்காத விசயம் எது?

பிடித்தவிசயம்: பொறுமை, தயாள குணம்,

என் மேல் வைத்திருக்கும் நேசம்

எல்லையற்ற நம்பிக்கை,பாசம் etc etc...

பிடிக்காத விசயம்:அவர் கோபம்,அதீத தயாளம்

10.யார் பக்கத்துல இல்லாம இருக்குறதுக்கு வருந்துகிறீர்கள் ?

உடன் பிறந்த, உடன்பிறவா சகோதரர்கள்

5 அண்ணா தம்பிகளுக்கு நடுவில் ஓரே பெண் அதனால் ரொம்ப செல்லம்

(now a days i miss them a lot)

சில வயது மூத்த அண்ணாக்களை பேர் சொல்லி கூட அழைத்தது இல்லை

வாடா போடா தான் அவ்வளவு மரியாதை அவர்கள் மேல்

11.இதை எழுதும் போது என்ன வர்ண ஆடை அணிந்து உள்ளீர்கள் ?

ஆகாய வர்ண ஷிபான் புடவை

12.என்ன பார்த்து//கேட்டுக் கொண்டு இருக்குறீங்க ?

இளையராஜாவின் ஹிட்ஸ்

13.வர்ணப் பேனாக்களாக உங்களை மாற்றினால் என்ன வர்ணமாக உங்களுக்கு ஆசை?

ரோஸ்,அடர்சிவப்பு

14.பிடித்த மணம்?

புதிதாய் பிறந்த குழந்தையின் நறுமணம்,

ஜான்சன்ஸ் பேபி சோப், பேபி லோஷன் +

இவை எல்லாம் கலோரி அதிகம் என்பதால் வாசம் பிடிப்பதோடு சரி

குலோப் ஜாமூன், கிருஷ்ணா ஸ்வீட்ஸ் மைசூர்பா,பால்கோவா

15.நீங்க அழைக்கப் போகும் பதிவரிடம் உங்களுக்கு பிடித்த விஷயம். அவரை அழைக்கக் காரணம் என்ன ?

வினோத் ,பாலா,சஞ்சய காந்தி வித்தியாசமான பதிவர்கள்

16.உங்களுக்கு இதை அனுப்பிய பதிவரின் பதிவில் உங்களுக்குப் பிடித்த பதிவு ?

காயத்ரியின் காதல் கவிதைகள் அனைத்துமே அழகு

வசந்தின் பதிவு வியக்கவைக்கும் அந்த கொசுவின் கதை அருமை

17. பிடித்த விளையாட்டு?

என் மகனுடன் விளையாடும் விளையாட்டுகள் அனைத்தும் பிடித்தம் + ஷட்டில்,

எனக்கு செல்லமாய் பி.டி.உஷா என்று பெயர் உள்ளது பள்ளி நாட்களில்

விளையாட்டுத்திடலில்

இப்பொழுது டிரெட்மில்லில்

18.கண்ணாடி அணிபவரா?

இல்லை ஆனால் அணிய வேண்டும் என்பது மருத்துவரின் ஆலோசனை

19.எப்படிப் பட்ட திரைப் படம் பிடிக்கும்?

பூ நான் மிக மிக ரசித்த படம் +

ஆட்டோகிராப் அதில் வரும் அருமையான பாடல்

ஒவ்வொரு பூக்களுமே என் மனம் தொய்வுரும் வேளையில்

நான் அதன் வரிகளை சொல்லிக்கொள்வேன்

20.கடைசியாகப் பார்த்த படம்?

அயன்

21.பிடித்த பருவ காலம் எது?

மார்கழி மாத குளிர் காலம்

இன்னமும் அந்த சிறு வயது ஞாபகம்

அம்மாவின் கைப்பிடித்து

அதிகாலை குளிரில்

விநாயகருக்கு நீருற்றியது

விநாயகரை என் நண்பராய் பாவித்து கதை பேசியது

என மார்கழியின் ஞாபகங்கள்

மனதோடு மழைக்காலம்

22)என்ன புத்தகம் படித்துக் கொண்டு இருக்கீங்க?

ஜென் கதைகள், ஈஷாவின் காட்டுப்பூ,சில கவிதை புத்தகங்கள்

23.உங்கள் டெஸ்க்டொப்-ல் இருக்கும் படத்தை எத்தனை நாளுக்கு ஒரு நாள் மாற்றுவீர்கள்?

அது என் மகன் பாலாஜியின் பொறுப்பு

24.பிடித்த சத்தம் ? பிடிக்காத சத்தம்?

பிடித்த சப்தம் :அம்மாக்களின் தாலாட்டு,என் மகன்களின் கொஞ்சல் சப்தம்

பிடிக்காதது :காட்டுக்கத்தலாய வரும் பாடல்கள்

25.வீட்டை விட்டு நீங்கள் சென்ற அதிக பட்ச தொலைவு?

சென்னை

26.உங்களுக்கு ஏதாவது தனித் திறமை இருக்கிறதா?

இது வரை ஒன்னும் இருக்கிற மாதிரி தெரியலை பா

ஆனால் நன்றாக கோலம் போடுவேன்

யாரும் எழுந்து ஓடாத அளவு பாடுவேன்

27.உங்களால் ஏற்றுக் கொள்ள முடியாத ஒரு விஷயம்?

என்னை யாரும் சந்தேகித்தால் என்னால் ஏற்றுக்கொள்ளமுடியாது

ஒரு முறை என்னை சந்தேகித்தால் அதோடு அவர்களின் தொடர்பை அடியோடு

முறித்துகொள்வேன் அதன் பின் என்ன சமாதானம் கூறினாலும் என் மனம் ஒப்பாது

28.உங்களுக்கு உள்ளே இருக்கும் சாத்தான்?

கர்வம்,ஆணவம்,திமிர் ஒழித்து விட முயல்கிறேன்

ஆனால் முடிவதில்லை

29.உங்களுக்கு பிடித்த சுற்றுலா தலம்?

கொடைகானல்,ஊட்டி

30.எப்படி இருக்கணும்னு ஆசை?

முடிந்த அளவு மற்றவர்க்கு உதவியாக

இல்லாவிட்டால் உபத்திரம் இல்லாத அளவு இருந்தால் போதும்

31.கணவர்(மனைவி) இல்லாம செய்ய விரும்பும் ஒரே காரியம் ?

அவர்க்கு தெரியாமல் எதையும் செய்ய விருப்பமில்லை

32)வாழ்வு பற்றி ஒரு வரி சொல்லுங்க?

மனதை செம்மைபடுத்து

மந்திரம் ஜெபிக்க தேவையில்லை

இந்த தொடர் பதிவுக்கு நான் அழைப்பது

சாய்ராபாலா,வினோத், சஞ்சய் காந்தி

என் கண்ணீரின் ஓசை

2009-05-25T01:03:00.000-07:00

நிலமே உன்னில் அவர் பதித்த
பாதச்சுவடுகளை பத்திரமாய்
ஒளித்துவை இனி அவைகளை
மீண்டும் நான் காணப்போவதேயில்லை

ஹே காற்றே அவரின் கடைசி சுவாசக்காற்றை
எங்கு ஓளித்துவைத்திருக்கின்றாய்
சொல்லிவிட்டு போயேன்

செந்தீயே நீ அவர் தேகம்
தின்றழித்தபோழ்து வலித்ததா
அவரின் வலிகளின் போது
எங்கள் பெயரை உச்சரித்தாரா???

எங்கோ அலைந்து திரிந்து என் பாதம் வருடி செல்லும்
நதியின் சிற்றலையே எங்கே அடித்து செல்கின்றாய்
உன்னில் கரைத்துவிட்ட அவர் அங்கங்களை

ஆகாயமே உன்னிடம் தான் இருக்கிறாரா??
பத்திரமாய் பார்த்துகொள் அவரை
நான் அங்கு வருகின்ற நாள் வரை

இருக்கின்றபோது தெரிவதில்லை
இழந்தபின் இழப்பின் வலி
தெரிந்தும்பயனில்லை

பஞ்சபூதங்களில் கலந்துவிட்டீரா
இவை கண்டவர் விண்டதில்லை
விண்டவர் கண்டதில்லை
என்கின்றனர்

என்ன ஆறுதல் யார் கூறினாலும்
இதயத்தின் இடுக்குகளில்
இன்னமும் இருக்கின்றது வலி
எனக்குள் கண்ணீர் ஊறும் ஓசை
உங்கள் காதுகளில் கேட்கின்றதா???

பி.கு: சென்ற வாரம் எங்களை
விட்டு பிரிந்த மாமானாருக்கு
என் கண்ணீர் அஞ்சலி

அப்பா எனும் அஸ்திவாரம் ....

2009-05-17T21:42:00.000-07:00

அப்பா......
என் முதல் கதாநாயகன்
என் முதல் தோழன்
தடுமாறும் போது தோள் குடுத்து
தடம் மாறும் போது தட்டி கேட்கும்
என் தோழமை நீங்கள்

சமூகத்து சொல்லம்புகள்
எனை காயப்படுத்தும்போது
என்னை கேடயமாய் காத்தீர்

தாய்பாலுக்கு நிகராய்
தன்னம்பிக்கை ஊட்டி வளர்த்தீர்
சுயசிந்தனை சுயமரியாதை என
என் சிந்தனை விரிந்தது உங்களால்

நான் விழும்போது எனை
எழுப்ப நீளும் முதல் கரம்
தங்களுடையது

காதலுக்கும் இனக்கவர்ச்சிக்கும்
உள்ள வித்தியாசம் உங்களால்
எனக்கு பயிற்றுவிக்கப்பட்டது

எத்தனை பேருக்கு கிடைக்ககூடும்
இப்படி ஒரு தந்தை!!!!!!!!!!!!!!

வாழ்கையின் எனை நோக்கிவரும்
எல்லா இன்னலும் எதிர்க்கிறேன்
எனக்கு பின் என் அப்பா இருக்கிறார்
என தைரியத்தில்........

அம்மாவின் ஆன்மிக கருத்துக்களும்
உங்களின் கம்யூனிசமும் பெரியாரிசமும்
என் அறிவுக்கண்னை திறந்தது எனலாம்
புலம் பெயரும் வரை.......
மெத்தையில் நான் உறங்கியதை விட
உங்கள் மடியில் உறங்கியதே அதிகம்

இன்று கர்லானும் ட்யுராவிளக்சும்
எனக்கு உங்கள் அருகில் உறங்கிய
நிறைவை தருவதில்லை..

இறைமை என்றாவது என் முன் தோன்றினால்
நான் ஒரே ஒரு வரம் கேட்பேன்
மறுமையில் எனக்கு நம்பிக்கை இல்லை
இறையே அப்படி மறுபிறவி என ஒன்று இருப்பின்
என் அப்பாவுக்கே நான் மகளாக வேண்டும் என...

சத்தமிடாதே ....

2009-05-15T20:05:00.000-07:00

அந்தகார இருளில் நான்
மூழ்கத்தொடங்குகையில்
ஆழ்மனதிலிருந்து ஒரு சில
அலறி எழுந்து கூப்பாடிடும்

என்னால் சத்தமிடக்கூடாது
என சமாதியாக்கப்பட்டவை அவை
எழுந்து அறைந்து அவைகளை கொன்று
எழும்பிய இடத்திற்கே திருப்பி அனுப்பிவிட்டு

சாளரங்களின்
வழியே விடியலுக்கான

வெளிச்சரேகைகளை
வெறித்துகொண்டே
வெற்றான
வெற்றிப்புன்னகையுடன்

விழிமூடுவேன்
விழித்தெழுகையில்

காய்ந்து நிற்கும்
கண்ணீர் திவலைகள்
காட்டிக்கொடுத்திடும்....

தோல்விகள் ....

2009-05-15T11:07:00.000-07:00

ஒவ்வொரு முறையும்
என்க்குள் எழும்
வலிகளையும்
வேதனைகளையும்
விவரிக்க வார்த்தை
தேடி தொலைகிறேன்

எங்கோ படித்தவைகளின்
தாக்கமே எனக்குள்
புதிதாய் புகுத்த
முயல்கையில்

தோல்விகளும்
வெறுமைகளுமாய்
திரும்புகின்றது
வார்த்தைகளும்
என்னால்
கவிதை எனப்படுவதும்....

என் தேவன் ...

2009-05-13T23:10:00.000-07:00

இவன் என்னவன் என்
அருகில் இருக்கவே விரும்புபவன்
அவ்வப்போது என்னை கட்டிபிடிப்பான்

எதிர்த்து பேசினால் எட்டி உதைப்பான்
கோவத்தில் கன்னம் கடிப்பான்
காதுக்குள் ரகசியம் பேசுவான்
முத்தமழையில் மூச்சுதிணறடிப்பான்

நான் அவனுக்கு மட்டுமே சொந்தமாம்
அதிகாரபூர்வமாய் அறிவிக்கின்றான்
யாருக்கும் என்னை தரமாட்டானாம்
எதோச்சதிகாரம் பேசுகின்றான்

பூமின்னலடிக்கும் புன்னகைக்காரன்
குறுகுறு பார்வையில் என் மனதை
கொள்ளையடிக்கும் வீரன்

வெடித்து சிதறும் என் கோவம்
அவன் சிரிப்பை கண்டால்
சிதறி சின்னாபின்னமாகும்

அவன் அழைப்பை கேட்டால்
திளைப்பு தோன்றும்
இவனுக்காய் கண் விழித்தால் என்
கருவிழிகள் களைப்படைவதில்லை

இனியேனும் நெற்றிக் கண்ணை திறந்துவிடு....

2009-05-13T04:18:00.000-07:00

ஆன்மிகம் எனும்
ஆனந்தபிரவாகத்தில் எனை
கரைக்க மனம் விருப்பியது

திருவண்ணாமலைக்கு இந்த
வீட்டுபுறா தன் சிறகை விரித்தது
அண்ணாமலையாரை கண்டது
உண்ணாமுலையம்மையை கண்டது

வெள்ளிநிலவின்
பொன்னிற இழைகளுடன்
இறைவனின் அருட்கதிர்களையும்
பெற்றுகொண்டே வீடேகினேன்

ஆனால் அங்கு கண்ட சில காட்சிகள்
என் மனதை சிதைத்தது
ஆண்டவனுக்கும் அசையாத
ஆர்பாட்ட சக்திகள்

ஆன்மிகஅற்புத உலகில்
போலி சிம்மாசனமிட்டு சிலதுகள்
தங்களை தேவதூதர்களாய்
பிரஸ்தபித்துக்கொண்டிருந்ததுகள்

பிஞ்சுகுழந்தைகளை
பள்ளி செல்லவேண்டிய
பசுந்தளிர்களை கேவலம்
பிச்சை எடுப்பதற்காய் பலதுகள்
பாடாய்படுத்திக்கொண்டிருந்த்ததுகள்

அதிலும் 6 வயது மதிக்கத்தக்க‌
பச்சைமண்ணை முட்படுக்கை மேல்
படுக்கவைத்திருந்தான் ஓரு மூடப்பதர் என்
அத்தனை லட்சம் நரம்புகளும்
அதை கண்டு கண்ணீர் விட்டது

எதிர்த்துகேட்க துணிச்சலில்லை
வாய்மூடி மெளனியாய் திரும்பினேன்

இறைவா உன் பாடுதேவலாம்
கண்மூடி கல்லாய் கடவுளாய்
கண்முன் நடக்கும் அக்கிரமங்களை
காணாது அமர்ந்துவிட்டாய்....

நெஞ்சு பொறுக்குதில்லையே....

2009-05-11T20:42:00.001-07:00

அண்ணாவும் பெரியாரும்
அறிவு ஊட்டி வளர்த்த கட்சிகள்

இன்று கரன்சி கொண்டும்
குத்துப்பாடல் கொண்டும்
வளர்க்கப்படும் வேதனை
காணசகியாது எழுதுகின்றேன்

வாக்களிக்கும் முன் யோசியுங்கள்

தமிழினம் தமிழினம் என
நம் தலையறுத்த கட்சிகளின்
முரண்பாடுகளை மனதில்
வைத்து வாக்களியுங்கள்

எவனோ ஒருவனின் மகுடத்திற்காய்
எத்தனை பேரின் தாலிகள் பறிக்கப்பட்டது
என நினைந்து வாக்களியுங்கள்

வாங்கிய கவர்களுக்கு
விசுவாசம் வேண்டாம்
எல்லாம் எவர் வீட்டு பணமுமல்ல‌
எல்லாம் நம்மிடமிருந்து
கொள்ளையடிக்கப்பட்டதே

உங்கள் விரல்களில் வைக்கும்
மைப்புள்ளி அக்கிரமத்திற்கு
முற்றுப்புள்ளியாகட்டும்

நாட்டுக்குள்ளேயே நாடுகடத்துவோம்
சாதிவெறி பிடித்த சர்பங்களை

நமை வைத்தே நமை அழிக்கும்
நச்சுகளின் கொட்டத்தை அடக்குவதாய்
இருக்கட்டும் உங்கள் வாக்குகள்.

அவளின்றி ஒரு அணுவும் அசையாது...

2009-05-09T20:46:00.000-07:00

அற்புதங்களின் பிறப்பிடம்
அன்னையின் இருப்பிடம்
அவளால் ஆரம்பித்துவைக்கப்பட்ட பயணமிது
அவளால் ஏற்றப்பட்ட உயிர்தீயிது
அவள் உயிர்குடித்து வளர்த்த உடலிது

அறுதியிட முடியாத அன்பின் ரூபமது
ஆழி தோற்க்கும் அவள் அன்பின் ஆழம் கண்டு
சந்ததிகள் வேர்விடுவதற்காய்
சங்கடங்கள் பல‌ சகித்தவள் அவள

மத்திய தர பெண்கள் பலரின்
விரதத்தின் மெய்ப்பொருள்அறிவீர்களா?
பிள்ளைகள் உண்டு மிச்சம்மிருப்பின் உண்பதே!!!!!
எத்தனையோ நாட்கள்
எங்களுக்காய் விரதமிருந்தவள் அவள்

நாங்கள் திரும்ப சிறிதே தாமதித்தாலும்
மணியிழந்த அரவாய் மதியிழந்த
வானாய் அவளின் கலக்கம்
நான் மக்கிப்போய்விட‌ இருந்தபோது
உயிர் உரம் இட்டவள் அவள்

அவள் வலி நான் உணர்ந்தபோது
உணர்ந்தேன் அவள் அருமை
நாம் எத்தனை முறை காயப்படுத்தினாலும்
நமை தொடரும் அவள் ஆசிகள்

என் முதல் தாலாட்டு அவள்
இதயத்து நுண்ணொலி
கருவாய் 45 நாட்களில் ஒலிக்கத்துடங்கிய
என் இதயத்தொலி இன்றும் உன் காதுகளில்.........

உன் அன்பு வலை பின்னலில் சிக்கி கொண்டு
என்றுமே வெளிவரக்கூடாது நான்......

பாரிஜாத தேவவிருட்சங்களும்
கற்பகத் தருக்களும் நான் நிஜத்தில்
கண்டதில்லை எனக்கு அவை
தேவையும் இல்லை நீ இருக்கும் போது....

(அனைவருக்கும் அன்னையர்தின நல்வாழ்த்துக்கள்)

நீ திரும்பி செல்கையில்....

2009-05-06T23:08:00.000-07:00

உன் தோள் சாய்ந்த
கதகதப்பில் சுகமான
தென்றல் இனி வாட்டும்...

உன் வீழியீர்ப்பு விசையில்
விழுந்தவள் எழும் முன்
விலகிச்செல்கின்றாய்...

நேசமாய் கேசம் புகுந்து
கோதிக்குடுத்த உன் விரல்கள்...

மொய்குழல் விலக்கி
முத்தமிட்ட நின் இதழ்கள்...

என் ஞாபகப் பெட்டகத்துள்
நினைவுப் பொக்கிஷங்களாய்...

உனக்கான காத்திருப்பு
என்னில் தொடங்கி இனி
எல்லையின்றி நீளும்...

உன்னால்
வேரறுக்கப்பட்ட
வேதனைகள் இனி
தலை தூக்கும் தன்னால்...

என் மனதின் குரல் ...

2009-05-05T22:56:00.001-07:00

எதையோ சாதித்து விட்டதாய்
தருக்கி திரிந்த எனை
என் மனம் கேட்டது
எதை சாதித்தாய்?

டிபார்மெண்ட் ஸ்டோர்களில்
கிரெடிட் கார்டை நீட்டிய நீ
கீரைக்காரியிடம் ஒற்றை ரூபாய்க்கு
சண்டையிட்டு தயாளம் பற்றிபேசுவாய்

பல உயிர்களை புசித்து
உடல் வளர்த்து ஜீவகாருண்யம் பற்றி
பேசும் உனை என் செய்வது

கூட்டுக்குடும்பத்தை குலைக்க
நினைக்கும் மனதை வைத்து
கொண்டு ஒற்றுமை
பற்றி கதையளக்கிறாய்

அழகிய நாட்களை
அகங்காரத்தால் இழந்திருக்கிறாய்
ஆணவத்துடன் திமிர்ந்திருக்கிறாய்

கசப்பான உணர்வுகளை
தின்று தின்று இறுகிய மனம்
சிரிப்பை தொலைத்த முகம்

முப்பதில் ஒயத்துடிக்கும்
ஜலெட்ஸ் ஆப் லான்கர்ஹான்ஸ்[கணையம்]
கொதிக்கும் குருதி

ஜம்பதில் அடங்கிவிடுவேன் என
அபாய மணியடிக்கும்
ரத்தமிறைக்கும் இயந்திரம்

இவைகளே உன் சாதனை என்றது
என் மனம் மறுபேச்சின்றி
தலை குனிந்தேன்....

உனக்கான ராஜபாட்டையில் நீ நட‌...

2009-05-03T23:24:00.001-07:00

காதல் ஆழம் காண முடியாத
கடல் அதில் மூழ்கி
முத்தெடுப்பவர் சிலர்
மூச்சை தொலைத்தவர் பலர்

காதலின் கைப்பிடியில் சிக்கி
கவிதை எழுதி தாடி வளர்த்து
குவார்டர் அடித்து என்ன இது????

எடுத்தெறி நம்மை
ஏமாற்றும் இந்த
கொடிய காதலை

காதல் மயில் பீலி சாமரம் வீசி
ரோஜா பூச்செண்டு
தந்து உனை வரவேற்குமா
இல்லை உன் பாதையில் முட்கள்
தூவுமோ யாரறிவர்

நீ வானத்து வீண்மீன்களுக்காய்
கண்ணை வானில் வைத்து நடந்தால்
பூமியில் இருக்கும் புதைகுழிக்குள்
சிக்கிக்கொள்வாய்

இந்த வாழ்வு எனும் மாயையில்
காதலும் ஒரு பக்கம் என்க‌
அது கைகூடாவிட்டால்
கிழித்தெறி அந்த நைந்த பக்கத்தை

உனக்கான ராஜபாட்டையில் நீ நட‌
ராணிகள் வருவர் தானாக....

[பி .கு] காதல் கவிஞர்கள் மன்னிப்பார்களாக.

மானுடம் உய்ய வா மழையே !!!!

2009-05-02T10:40:00.001-07:00

காடுகளை அழித்தும்
கார்பன்களை உதிர்த்தும்
உனை அவ்வப்போது குறையாய்
பிரசவிக்கவைத்தோம்...

நதியில் நான் துளைந்து
விளையாடிய நன்னீர்
இன்று பாட்டிலில்
விற்பனைக்காய்...

நிறைசூல் கொண்டு நீ
நடந்ததை நானறிவேன்
உன்னால் கைவிடப்பட்ட‌
என் கரிசல் காடுகளின்
கதறச்சிதறல்கள் என் காதுகளில் ...

ஆற்றின் நகைப்பும் அருவியின் சலசலப்பும்
மீண்டும் வேண்டும் எனவேண்டுகிறேன்
உன்னிடம் உனை மலடாக்கிய‌
கூட்டத்தில் நானும் குற்றவாளியாய்....

விகடனில் எனது பதிவு

2009-05-02T06:41:00.000-07:00

நண்பர்களுக்கு வணக்கம்
இன்று விகடனில்
எனது தோழி தமிழரசி அவர்கள்
எனது மதிப்பிற்குறிய கவிஞர் முத்துராமலிங்கம் அவர்கள்
ஆகியோருடன் எனது கவிதையும் வெளியாகியுள்ளது
என்பதை உங்களிடம் மகிழ்வுடன் பகிர்கின்றேன்
இது விகடனில் எனது நான்காவது பதிவு
நன்றி வலைப்பூ அன்பர்களே...
http://youthful.vikatan.com/youth/index.asp

கொங்கு காதல்....

2009-05-01T11:20:00.000-07:00

எப்பவும் எனை நினைச்சு
கிறக்கப் பார்வை பார்க்கும்
எளந்தாரிப் பயபுள்ளை
உன்னை தவிர ஒரு பயலும்
என் மனசிலே தான் இல்லை

உனக்கான பாதையிலே
மல்லிகைபூ தூவி வைச்சேன்
உன்னோட வாழ தானே
கோவிலிலே நேர்சை வைச்சேன்

உன்னோட நான் நடந்தா
வெக்கை கூட குளிருதய்யா
நீ இல்லாத போது நிலவும்
கேலி செய்யுதய்யா
அது நிழலிலே தான் என் மேனி
கருக்குதய்யா....

***************************************************

பத்து வயசு நானிருப்பேனா
பக்கம் வந்து பஞ்சுபொதியா
உன்னை தந்து பக்குவமா சொன்னாக
அத்தை பொண்ணு அழகை பாருன்னு அப்பவா

சிற்றாடையா பட்டாடைய
கட்டி பக்கம் வந்து
பார்த்தும் பாக்காது போனியே அப்பவா

பருவத்து வாசலிலே தாவணி அணிஞ்சு
பச்சையோலைக்குள்ளே புகுந்து
கள்ளப் பார்வை பாத்தியே அப்பவா

மாராப்பு சேலையுள்ளே
என் மனசே முடிஞ்சுகிட்டு
வரப்போரம் போர புள்ளே

சொல்லிப்புட்டு போ புள்ளே
எப்போ என் மனசுக்குள்ளே நீ நுழைஞ்சே
சொந்தக்கார மாமன் புள்ளே...

பி.கு: நண்பர்களே சங்க காலப் பாடல்
மூலம் சொன்ன காதல்
இப்போ கொங்கு தமிழில்
(எங்கள் வட்டார மொழி)

நீ வருவாய் என...

2009-04-29T08:45:00.000-07:00

என்னவளே என்னில் கரைந்தவளே
உன் வருகைக்காக ஏங்கும்
என் ஒவ்வொரு இதயத்துடிப்பும்...

லட்சங்களில் நான்
சம்பாதித்தபோதும்
எனது வாழ்வின் லட்சியம் நீ
வாழ்வின் செழுமைக்காக இளமையை
தொலைத்துவிட்ட பாவி நான்...

என் தேகத்தின்
ஒவ்வொரு செல்லும்
செய்யும் யாகத்தின் வரமடி நீ...

நான் கட்டிவைத்துள்ள
என் ஹார்மோன்களின் தவிப்பை
உன்னால் மட்டுமே
கட்டவிழ்த்துவிடமுடியும்...

காலப் பெருவெளியில்
பிரபஞ்சப் காரிருளில்
நாம் கரைந்திட்டே
கூடு விட்டு கூடு ஜீவன்
பாய்ந்திடதோன்றிடுதே...

கனவில் மட்டுமே கண்ட நம் மழலைக்கு
உயிரும் மெய்யும் தரப்போகும்
உன் வரவுக்காய் வழிமேல் விழியோடு
அது என் சாயலா இல்லை உன் சாயலா
என எண்ணி எண்ணி தவிப்போடு...

என் தேவதையே
இன்னமும் 10 நாட்களாம்
நாட்குறிப்பின் தாள்களை
வேகமாய் கிழித்து
உன் வரவின் நாளை
மேனிசிலிர்க்க பார்த்திருப்பேன்
உனக்காய் காத்திருப்பேன்...

மீண்டும் விகடன் ...

2009-04-29T02:52:00.000-07:00

விகடனில் இது எனது 3 வது பதிவு
நன்றி நண்பர்களே தங்களின்
ஆதரவுக்கு
http://youthful.vikatan.com/youth/sakthipoem28042009.asp

அற்றை திங்கள் அந்நிலவில்....

2009-04-27T08:49:00.000-07:00

தலைவனை பற்றி தலைவி

அற்றைத் திங்களில் அள்ளியெடுத்து அணைத்தனன்
மோகனப் புன்சிரிப்பில் மூழ்கடித்தனன்
மந்தகாசப் பார்வையில் மனம் மயக்கினன்
சிருங்காரத்தில் சிந்தை மயங்கி சிலிர்த்தனன்
என்னில் அன்பை அகழ்ந்தெடுத்தனன்
ஏகாந்தத்தில் எனை இருத்தினன்....

கன்னம் கன்றி சிவக்க வைத்தனன்
அவ்வப்போது துயில் கலைத்தனன்
பெண்மையின் மென்மை உணர்த்தினன்
சிப்பிக்கு முத்துக்களை பரிசளித்தனன்
வார்தைகளில் ஜாலம் புரிந்தனன்
வாராமலே சில நாள் நோகடித்தனன்....

தலைவி பற்றி தலைவன்

நாணிச் சிரிக்கின்றாள்
வெட்கிக் குனிகின்றாள்
எண்ணி தவிக்கின்றாள்
தேனினும் இனிய தீஞ்சுவை
குரலில் அழைக்கின்றாள்....

நாடி வந்தால் ஓடி ஒளிகின்றாள்
நயன மொழி பேசுகின்றாள்
காதிலோ காதல் ஜதி சொல்கின்றாள்
பல நாழிகை பார்த்து ரசிக்கின்றாள்
பாராமல் நான் போனால் துடிக்கின்றாள்....

ஆரம்பிச்சுட்டாங்கய்யா ஆரம்பிச்சுட்டாங்க....

2009-04-26T20:13:00.000-07:00

இங்கே கட்சி கொடிகள்
மூலைக்கு மூலை ஆனால்
பாவம் தொண்டர்கள்
தான் இன்னமும் ஏழை...

அவசர அவசரமாய்
அலங்கரிக்கப்படும் சாலை
உற்சவர் மட்டுமல்ல
மூலவரும் உலா வரும் வேளை...

ஆணவக் குரங்கு
அலைக்கழித்தபோதும்
ஆப்பசைத்த குரங்காய் தேடியலைவர்
வாக்காளர்களை தேடியலைவர்...

இதோ இறுதிப்பட்டியல் வரும் வரை
இன்னமும் எத்தனை வேட்பாளர்
இதயம்
இடம் மாறப்போகின்றதோ...

நேற்று உண்ட உணவு
செரிக்கவில்லை போலும்
இன்று உண்ணாவிரதமாம்
வந்துவிட்டது ஓலை...

இங்கு இருப்பது

எழாத சூரியன்
செல்லரித்த இலை
நம்பிக்கை தராத கை
சேற்றில் இருக்கும் கமலம்...

சுத்தாத பம்பரம்
ஒலிக்காத முரசு
அழுகிப்போன பழம்
சீறாத சிறுத்தை.

பி.கு நல்லதா ஏதாவது கட்சியிருந்தா
சொல்லிட்டு போங்கய்யா
சொல்லிட்டு போங்க

அவளோடான என் நாட்கள்.......

2009-04-25T12:42:00.000-07:00

அவனும் அவளுமான
நாட்களின் டைரிக்குறிப்பை
நான் புரட்டியபோழ்து....

மூங்கில் காடுகளை
புல்லாங்குழலாய்
பூக்கச் செய்திருக்கின்றனர்...

வெண்ணிலவின்
வெட்கக்கரையை
வெண்மேகம் கொண்டு
துடைத்திருக்கின்றனர்....

மஞ்சு பொதிகளை மஞ்சமாக்கி
தலையனைகளை தடம் புரள செய்து
கட்டிலை கதறியழச்செய்த‌
காதல் களத்து கர்மவீரர்கள்....

மினுங்கும் நட்சத்திரத்து
சினுங்கொலியை
தங்கள் நகையொலியால்
வென்றிருக்கின்றனர்...

இவர்களை
காண அமாவாசையன்று
நிலவு எட்டிபார்த்தால்
அன்று பொளர்ணமியாகிவிட்டதாம்
அலட்டிக்கொள்கின்றார்கள்....

இதற்கு மேல் படிக்க
இயலாததால்
எழுந்துவந்துவிட்டேன்
போங்கபா.

2009-04-22T09:37:00.000-07:00

மீண்டும் விகடனில்

http://youthful.vikatan.com/youth/sakthipoem220409.asp

உல்லாசமாய் உற்சாகமாய் !!!!!

2009-04-21T10:38:00.000-07:00

பச்சை நிறப்புல்வெளியை
பாய்ந்தோடும் நதியை
இச்சைகளற்ற மனங்களை
இயற்கையின் வளங்களை
காணப் போகின்றேன்

மலையரசியின் மடியில்
மயக்கம் கொள்ள போகிறேன்
வளைவான பாதைகளில்
வளைந்தோடப் போகின்றேன்

கஸ்தூரி மஞ்சள் முகமும்
கள்ளமில்லா உளமும்
கனகாம்பரமும் சூடிய‌
கயல் பேசும்
காரிகைகளை காண போகின்றேன்

பூக்களின் சுவாசத்தை உணரவும்
என் உறவுகளின் நேசத்தை உணரவும்
ஒப்பனையற்ற அற்புத முகங்களை
நோக்கிப் பயணிக்க போகின்றேன்

எனக்காகவே
ஓடி ஓடி உழைக்கும் என்னவன்
அங்கு சிறிது ஓய்வு எடுக்கட்டும்
ஆடி பாடி என் மழலைகள்
அங்கு ஆனந்தத்தில் திளைக்கட்டும்

ஜெயப்பேரிகை கொட்டட்டும்

2009-04-18T11:14:00.000-07:00

இங்கு அரிசி ஒரு ருபாய்
குழம்பு 100 ரூபாய்
இலவசங்களுக்கு ஆசைப்பட்டால்
இதுவே விதியாய்

அட எதிரணியினரோ
டாஸ்மாக் அறிமுகம் செய்து
கஜானாவை நிரப்பும் கலையை
கற்றுத்தந்த கண்ணியவான்கள் இனி

மதங்களின் பேரால் மயக்கம் வேண்டாம்
இனங்களின் பேரில் இச்சை வேண்டாம்
ஜாதீய சங்கங்கள் வேண்டவே வேண்டாம்

ஊடகங்கள் இவர்கள் வசம் என்பதால்
உண்மைகள் மறைக்கப்படலாம்
ஊழலைக் களைய
உறுதி எடுப்போம் வாருங்கள்

மற்றவர்களின் மதிப்பீடுகளை களைந்தெறிந்து
இலக்கை நோக்கி திடமான
அடிஎடுத்து வையுங்கள்

என் இளையசமுதாயமே
தீட்டிய வாள் எங்கே
தினவெடுத்த தோள் எங்கே அட
தூங்கிக்கொண்டு இருக்கிறதா அங்கே???

நீங்கள் விழித்துகொள்ளுங்கள்
பிழைத்துகொள்ளுங்கள்
குறட்டை விட்டால்
"கோட்டையய்" விட்டுவிடுவீர்கள்

இளையவர்களே எழுக‌
ஜெயப்பேரிகை கொட்ட
வெற்றி உமைச் சேர
விடியல் எமைச் சேர

2009-04-18T06:22:00.000-07:00

முதல் முதலாக என் பதிவு
விகடனில் நன்றி தோழர்களே...
http://youthful.vikatan.com/youth/sakthipoem17042009.asp

காரமான காரணங்கள் !!!!

2009-04-17T10:17:00.000-07:00

உலகத்தின் எங்கோ
ஒர் மூலையில் இருக்கும் தோழர்களே
உள்ளத்தில் வலியுடன்
பகிர்கின்றேன் கேளுங்கள்
எங்கள் நாட்டில் பெண் சுதந்திரம் என்பது
பேச்சளவில் மட்டுமே

இன்றும் 16 வயதில்
பிள்ளை பெறும் இயந்திரங்களாகவே
பலரின் கண்களுக்கு இதைச் சொல்லவா

பசும்பொன் இல்லாததால் இன்றும்
30 வயதாகியும் "முதிர்கன்னியாய்"
பேதையாய் அவள் அதைச்சொல்லவா

இயற்கையின் வஞ்சனையில்
பிள்ளை பெறாவிட்டால்
மலடான சொற்களால் எங்கள்
மனதை இருகூறாக்குவர் "மலடி"என்பர்
இதைச் சொல்லவா

கொண்டவன் மூடனாயிருப்பின்
நடுரோட்டில் நாயை விட கேவலமாய்
மிதிபடுகின்றனறே அதைசொல்லவா

அவனே வேண்டாம் என விரட்டி விட்டால்
எங்கள் வாழ்க்கை வெட்டி "வாழாவெட்டி"
இதைச்சொல்லவா

அவன் இறைவனடி சேர்ந்தால் "கைம்பெண்ணாய்"
அடைமொழியுடன் வீட்டுச்சிறையில்
அதைச்சொல்லவா

எதைச்சொல்லசொல்கிறாய்
எங்களுக்கு பறக்கசொல்லிதந்து
சிறகை பறித்துகொள்கின்றிர்கள்
இதைவேறு சொல்லசொல்கின்றிர்கள்

புண்கள் புரையோடிபோன போன
சமூகத்தில் இருந்து போராளியாய் நான்
போராடிக்கொண்டு தான் இருக்கின்றேன்
நிழலில் அல்ல நிஜத்தில்

குவார்டரும் கோழி பிரியாணியும்

2009-04-14T02:33:00.000-07:00

ஆரம்பித்துவிட்டது
ஐந்தாண்டுகளுக்கு ஒருமுறை
நடக்கும் அரசியல் கேலிக்கூத்து

இனி வாக்குரிமை விலைப்பேசப்படும்
குவார்டர்க்கும் கோழி பிரியாணிக்கும்
கற்றை நோட்டுகளுக்கு
கள்ளவோட்டுக்கள் விற்கப்படும்

வீரம் விலைபோகும்
விவேகம் துணைக்கு வாராது
விலை படிந்துவிட்டது
வீரம் பேசியவர்க்கு

சிறுத்தைகளாய் சீறியவர்கள்
சிந்தனைகள் மழுங்கி
சில இறைச்சி துண்டுகளுக்காய்
தங்களை கூண்டுக்குள்
ஒளித்துகொள்ளுவார்கள்

தளர்ந்த வயதில்
தள்ளாமையுடன்
தலைமை இதுதான்
இன்றைய‌ திராவிடத்தின் நிலைமை

எங்கள் இனம் எங்கோ
அழிந்துகொண்டிருக்கும்
அதை பற்றி அவ‌ர்களுக்கு என்ன‌
அவ‌ர்களுக்கு தேவை
ஆட்சியும் அதிகாரமும் மட்டுமே

எங்கள் முதுகெலும்பு
முறிக்கப்படும்
இனி எங்களை
முளையில் கிள்ளிவைப்பர்
உணர்வுகளுக்கு கொள்ளி வைப்பர்

சிந்தியுங்கள் இளைஞர்களே
சிந்த்தியுங்கள்
நிலாவாய் இரவல் வெளிச்சம் இன்றி
ஆதவனாய் அம்ர்க்களமாய்

கண்ணாமூச்சி ஏனடா ???

2009-04-12T10:13:00.001-07:00

என் மனக்கரையோரத்தில்
நீ பதித்து சென்ற காலடித்தடங்கள்
என்ன கல்லில் பொறிக்கபட்டதா???
எத்தனை அலை வந்தாலும்
அழியவில்லையே!!!

அப்போதெல்லாம் உன் வார்த்தைக்கு
விளக்கம் தெரியாதவள்
இப்பொழுதெல்லாம் உன் மொளனத்திற்கு
விளக்கவுரை எழுதிகொண்டிருக்கிறேன்

இழந்துவிடுவேனோ என்ற பயத்தில்
இருக்கின்ற நொடிகளை
தொலைத்துவிட்டேனா????
தொலைத்ததை தேடினால்
நானும் தொலைவேனோ???

அவள் தாயாக போகின்றாள்

2009-04-09T22:30:00.001-07:00

அவள் தாயாகப் போகின்றாள்!
ஆம்!! அவள் தாயாகப் போகின்றாள்!

இன்றுவரையிலான அவர்கள் உலகத்தில்
இன்னும் இன்பம் சேர்க்கவரும் ஜீவனால்
இன்று ஒரு பொன்னாள்

அவன் காத்திருக்கிறான்
கண்ணீருடன் தங்கள்
காதல் சின்னத்தின் வருகைக்காய்

முதல் மூன்று மாதங்களில்
மசக்கையில் உடல் தளரிடும்
நடு மூன்று மாதங்களில்
சற்றே தேறிடும்
பின் மூன்று மாதங்களில்
வயிறும் மேடிடும்

மானுட உதிரம் நிறம்
மாறிக் கண்டிருக்கின்றீரா
இதோ இயற்கை இங்கு
இவள் உதிரத்தின் நிறம்
மாற்றிக் காத்துகொண்டிருக்கும்
அந்த பிஞ்சு பால் முகத்தின் வரவுக்காய்

பெற்றவளுக்கு மட்டுமே தெரியும்
பிரசவத்தின் வலி மற்றவர்க்கு
தெரியுமா என்ன‌???
அந்த வலியை விவரிக்க
வார்தைகள்தான் உண்டா வையத்தில்???

அகிலத்தை பொறுத்தவரை
அது ஒரு அறை
எங்களுக்கோ அது ஒரு களம்
ஜீவமரணப் போராட்டகளம்

சென்று வா மகளே
இந்த தாய்க்கு சேயாய்
உன் சேய்க்கு தாயாய்
வென்று வா!!!!!!

பெண்கள்

2009-04-07T10:20:00.001-07:00

எத்தனை கோடி
இன்பம் வைத்தாய் இறைவா
எங்களுக்கு மட்டும் ஏன்
துன்பமும் சேர்த்துவைத்தாய்

நண்பர்கள் என்ற போர்வையில்
சிலர் நகைக்கின்றனர்
அங்கம் வருணித்து

இவர்களின் வார்தை தூண்டில்களும்
வக்கிரப்பார்வைகளும் இன்னும்
எத்தனை யுகங்களுக்கோ

சிகண்டிகளும் தப்புவதில்லை
சிறுமிகளும் தப்புவதில்லை
சிலரின் சில்லரைதனங்களிடமிருந்து

ஆடு மாடுகளிடம்
கற்பழிப்பு இல்லை
கருக்கழிப்பு இல்லை

ஐந்தறிவு ஜீவன் கூட‌
அத்துமீறுவதில்லை
ஆறறிவு மக்களோ
அதற்கும் கீழாய்

நாங்கள் மட்டும்
வலிகளுக்கும்
வேதனைகளுக்கும்
வடுக்களுக்கும்
சொந்தகாரிகளா????

அதிகாலை (சக்தி & சக்திகுமார் )

2009-04-07T04:19:00.001-07:00

அதிகாலை நிலவை ஏமாற்றி
பூமியை ஆக்ரமித்த‌ நினைவில் குளிர்ந்து
பனி சின்னம் கொண்ட முகத்துடன்
சிவந்து எழுந்தான் நிலவின் காதலன்

நிசப்தமான காலையில்
அமைதியான யுத்தமோ
நித்திரையை தொலைத்து
பாடி திரியும் பறவைகள்
பாட முடியாவிட்டாலும்
காற்றில் ஆடும்
வண்ணத்துபூச்சிகள்

புது நாட்களை வரவேற்க பூக்கும் மலர்கள்
கானும் போதே கற்பனை விரியும்
என்னையும் தான்டி விண்னையும் தாண்டி
அழகான விடியலை கால் நூற்றாண்டாய்
காணாமல் விட்டேன்

நல்ல வேளை
நான் துருவத்தில் பிறக்கவில்லை
பிறந்திருந்தால் வருடத்திற்க்கு
ஒரு முறை தான் விடியல்
விடியலை கண்டவர்கே
வாழ்கையில் விடியல்
எனக்கும் இன்று தான் விடிந்தது

இதயம் ரணமானது!!!!

2009-04-04T18:59:00.000-07:00

திக்கற்ற வெளியில்
திசையறியாது

தவிக்கின்றேன் தோழி
திரும்பி பார்த்தால்

உற்றவள் நீயும் இல்லை
உறவினரும் இல்லை

கண்ணில் உன்னை வைத்தால்
கண்ணீருடன் கரைந்திடுவாய்

என எண்ணி உன்னை
என் இதயத்தில் அன்றோ இருத்தினேன்
என் இதயத்தின் ஓசை கேட்டு

இதமாய் நீ உணர்வாய் என
இன்று இதயமும் ரணமானது
இதுவே நிஜமானது

செத்துவிட்ட என் மனதை இனி
சுடுகாட்டு தீயா சுட்டுவிடும்

உயிரோவியம்

2009-04-01T21:11:00.000-07:00

எத்தனை இன்னல் வரினும்
அத்தனையும் மறந்து்போகும்
உன் அன்பு முத்தத்திலும்
அம்மா என்ற அழைப்பிலும்

அல்லி மலர் பாதமும்
அனிச்ச மலர் தேகமும்
கண்டவர் உள்ளம் உவகை கொள்ளும்
உங்களை காணாதவர் உலகம் இருளும்

இனணயற்ற ஒவியன் பிரம்மன்
எந்த தூரிகை கொண்டு உன்னை
வரைந்தனன் உன் வண்ணம் என்ன‌
வானவில்லில் கடைந்ததோ

நற்றமிழும் அற்றமிழும்
நாணம் கொள்ளும்
நின் அற்புத வதனத்தின்
அழகை பகர இயலாது

ஒவியங்கள் அசைவதில்லை
நீ மட்டும் அசைந்தாடும்
உயிரோவியமாய்!!!!